Një studim i kryer së fundmi (nga përpunimi i të dhënave të Numbeo për 41 shtete) bazohet në perceptimin subjektiv të sigurisë së individëve kur ecin vetëm në rrugë gjatë natës, në vende të ndryshme.
Shqipëria renditet e 12-ta nga fundi, me 52.34. Siguria në vendin tonë perceptohet më e ulët se të gjitha vendet e tjera të rajonit, si Serbia, Mali i Zi apo Maqedonia e Veriut.
Eduard Cekoja, trajnues guidash turistike, tha në emisionin “Goodmorning Albanians” në Euronews Albania, se Shqipëria nuk mund të cilësohet vend i rrezikshëm.
Sipas tij, për shqiptarët është krijuar percpetimi i një populli ballkanas gjaknxehtë, por Shqipëria është një vend i sigurt për turistët.
“Shqipëria ka imazhin e një destinacioni ballkanas, pak gjaknxehtë, por është vend i sigurt. Nuk gjykoj që Shqipëria është vend i rrezikshëm, nuk kanë ndodhur incidente të rënda, gjëra të vogla. Në Shqipëri vijnë 5 mln turistë, do ketë edhe incidente. Ka evoluar situata: para 10 vitesh kur shkonim në Theth ishte ndjesia “kaloi edhe këtë herë”, sot nuk është e njëjta ndjesi. Ne jemi popull mikpritës, kur ka ndonjë incident të vogël bëhet lajm”, tha Cekoja.
