Aktorja e skenaristja Anisa Markarian është rikthyer në atdhe për të prezantuar një tjetër rrëfim në jetën e saj në Tiranën e viteve ’60. E ka promovuar fillimisht në qytetin e Durrësit, por do të rrugëtojë edhe në qytete të tjera të Shqipërisë për të takuar lexuesin e saj.
Nën interpretimin e miqve, kolegëve, personazheve të kinematografisë, teatrit apo edhe vetë qytetit të Durrësit. Kështu ka zgjedhur që ta prezantojë librin e saj më të ri, Anisa Markarian.
Përmbledhja me tregime “Shtëpia te Selvia” është një dedikim për prindërit, zbulon Markariani në një intervistë për A2 CNN.
“Libri i kushtohet dy prindërve, një homazh dhe falënderim shumë i madh, sepse unë jam ajo që kanë qenë ato, dhe veçanërisht historia e tim ati ka ndikuar shumë në formimin dhe personin që unë jam, duke i ngarkuar vetes detyra që askush nuk m’i kërkonte”, rrëfen ndër të tjerat Markarian.
“Shtëpia te Selvia” risjell Tiranën e vitet ‘60, me ngjarje që shkojnë deri në vitet ’80 të Shqipërisë së mbyllur, por për të cilën autorja është nostalgjike.
Anisa Markarian ka zgjedhur që ta prezantojë këtë vepër jo vetëm me anë të leximit artistik, por edhe përmes imazheve që lidhen me jetën e saj, me jetën e një Shqipërie dikur.
