Raportimet e mediave të shkruara në Kosovë dhe Shqipëri se një nga dy personat me nënshtetësi ruse të shpallur non-grata nga shteti i Kosovës, janë parë duke lëvizur në Prishtinë, i ka përgënjeshtruar Policia.
Në një komunikim zyrtar për medie, Policia e Kosovës sqaron se këto informacione janë të pa sakta, duke sqaruar se ata të dy, kanë lëshuar shtetin e Kosovës një ditë pas vendimit ët marrë nga qeveria e Kosovës.
“Dy personat, Alexey Krivosheev dhe Denis Vengerskii shtetas rus, janë shpallur non-grata nga institucionet shtetërore të Kosovës me datë 22.10.2021, dhe bazuar në informacionet zyrtare të Policisë së Kosovës të evidentuara në sistemin kufitar, të njëjtit me datë 23.10.2021 (në ora 14:46 dhe 14:50), përmes pikës kufitare në Merdare kanë lëshuar territorin e Republikës së Kosovës”.
“Vlen të potencohet se të njëjtit, nga data 23.10.2021, nuk kanë hyrë në Republikën e Kosovës”, shpjegon më tej Policia.
“Ndërsa personi i cili është publikuar dhe shfaqur në media përmes fotografive dhe videos, është person tjetër (V.L.) i njohur për institucionet e sigurisë në Kosovë, si punonjës në zyrën ruse në Kosovë”.
