Mijëra qytetarë dolën në rrugët e Beogradit mbrëmjen e së premtes për të mirëpritur studentët që mbërritën në kryeqytetin e Serbisë në këmbë nga skajet e largëta të vendit, për një protestë të madhe që do të zhvillohet të shtunën.
Duke mbajtur në duar pankarta me mbishkrimin “studentë, Beogradi është i juaji”, qytetarët i pritën studentët në kryeqytet edhe me medalje e lule, shkruan A2 CNN.
Studentët, të cilët i kanë bllokuar fakultetet anembanë Serbisë për më shumë se tre muaj, kanë bërë thirrje për një protestë në Beograd më 15 mars.
Tubimet e së shtunës pritet të jenë më të mëdhatë që janë parë në Serbi në dekada. Autoritetet presin që diku midis 60,000 dhe 80,000 protestues të mbërrijnë në kryeqytet, tha presidenti Aleksandar Vuçiç.
Organizatorët thonë se presin shumë më tepër. Studentët kërkojnë përgjegjësi penale dhe politike për vdekjen e 15 personave nga shembja e një strehe në stacionin hekurudhor të Novi Sadit më 1 nëntor 2024.
