Studiuesi i njohur i islamit, Tariq Ramadan, dënohet për përdhunim nga gjykata zvicerane

Tariq Ramadan, studiues i njohur i islamit dhe figurë publike e debatueshme në Evropë, është dënuar përfundimisht nga autoriteti më i lartë gjyqësor në Zvicër, njoftoi të enjten, më 28 gusht, Gjykata Federale Zvicerane.

Ai u dënua me tre vjet burg, nga të cilat një vit burgim i pakushtëzuar, për përdhunim dhe detyrim seksual, bazuar në një rast që daton në vitin 2008.

Sipas gazetës “L’Orient Le Jour”, Gjykata Federale refuzoi ankesën e Ramadan-it kundër dënimit të dhënë nga Gjykata e Drejtësisë së Gjenevës vitin e kaluar. Ramadan ishte liruar fillimisht në shkallën e parë, por më pas u dënua në apel në vitin 2024.

“Mbrojtja merr në konsideratë vendimin e Gjykatës Federale dhe e kundërshton atë. Kjo e vërtetë gjyqësore nuk e cenon aspak të vërtetën që mban zoti Ramadan, edhe nëse nuk e përforcon atë”, deklaruan avokatët e tij Me Yaël Hayat dhe Me Guerric Canonica, përmes një komunikate për AFP-në.

Ata konfirmuan gjithashtu se vendimi do të apelohet në Gjykatën Evropiane për të Drejtat e Njeriut (GJEDNJ).

“Fjalën e fundit tani do ta ketë Gjykata Evropiane për të Drejtat e Njeriut”, shtuan ata.

Kjo është hera e parë që Ramadan, 63 vjeç, dënohet për përdhunim. Në marsin e ardhshëm ai pritet të dalë para gjykatës në Francë, për një çështje tjetër që përfshin akuza për përdhunim nga tre gra, ngjarje të ndodhura gjatë viteve 2009–2016, në kontekstin e lëvizjes #MeToo. Ai i mohon të gjitha akuzat.

Paditësja në rastin në Zvicër, një grua e konvertuar në islam, e njohur me pseudonimin “Brigitte” për arsye sigurie, bëri kallëzimin në vitin 2018, një dekadë pas ngjarjes, e nxitur nga rastet e ngjashme të paraqitura në Francë.

Avokatët e saj, Veronique Fontana, François Zimeray dhe Robert Assaël, thanë për AFP se:

“Vendimi i Gjykatës Federale shënon fundin e një prove të gjatë dhe të një beteje të gjatë gjyqësore për klienten tonë dhe për avokatët e saj.”

“Ajo e ka luftuar këtë betejë në heshtje dhe pa urrejtje, me dinjitet të jashtëzakonshëm.”

Gjatë proceseve gjyqësore në Gjenevë, paditësja rrëfeu se ishte përdhunuar dhe dhunuar fizikisht nga Ramadan në një dhomë hoteli më 28 tetor 2008, ndërsa ai pretendoi se marrëdhënia ishte e lejuar vetëm deri në puthje, dhe e akuzoi paditësen për hakmarrje.