Administrata amerikane e presidentit Donald Trump po përballet me probleme të konsiderueshme, veçanërisht në ndërtesën e Pentagonit.
Raportohet se drejtori dhe zëvendësi i tij në Agjencinë e Sigurisë Kombëtare janë shkarkuar nga detyra. Bëhet fjalë për zyrën më të fuqishme amerikane të inteligjencës kibernetike.
Lajmi raportohet nga CNN duke cituar anëtarë të komitetit të inteligjencës të Senatit dhe Dhomës së Përfaqësuesve të SHBA-ve. Shkarkimet vijnë pas largimit nga puna të shumë anëtarëve të stafit në Këshillin e Sigurisë Kombëtare, pasi Laura Loomer, aktivistja e së djathtës ekstreme që dikur pretendonte se 11 shtatori ishte një inskenim i brendshëm, i kërkoi Presidentit Donald Trump gjatë një takimi të mërkurën ta bënte këtë, duke argumentuar se ata ishin të pabesë.
Nuk është e qartë nëse këto lëvizje lidhen me njëra-tjetrën. Muajin e kaluar, krerët që tashmë janë shkarkuar pritën miliarderin Elon Musk, që udhëheq Departamentin për Efiçencë Qeveritare, në selinë qendrore të Agjencisë për Sigurinë Kombëtare dhe të Komandës Kibernetike.
Disa zyrtarë të mbrojtjes i kanë thënë CNN se ka një frikë në rritje brenda ushtarakëve të nivelit të lartë në Pentagon për një shkarkim të beftë nga Trump nëse vlerëson se ata nuk i janë besnikë. Problemet për këtë Departament të rëndësishëm nuk përfundojnë me kaq.
Pentagoni do të hapë një hetim të brendshëm për sekretarin e mbrojtjes, Pete Hegseth, lidhur me grupin në platformën Signal, ku diskutoi me anëtarë të tjerë të administratës për sulmin amerikan kundër militantëve Houthi.
Ndërsa Shtëpia e Bardhë përpiqet të minimizojë bisedën që ka përfshirë disa nga zyrtarët e saj të rangut më të lartë, Departamenti i Mbrojtjes synon të shikojë qartë dhe të konstatojë nëse Hegseth ishte në përputhje me “politikat dhe procedurat e Departamentit në përdorimin e aplikacionit të mesazheve komerciale për të kryer detyrat zyrtare”.
Hetimi u nxit nga një komitet i Senatit pasi u publikua përmbajtja e bisedës, duke përfshirë informacionin e klasifikuar që përmbante në lidhje me sulmin amerikan.
