Ambasadori i Serbisë në Shtetet e Bashkuara të Amerikës, Marko Gjuriç, reagoi nëpërmjet një postimi në “X” për heqjen e një billbordi në Zveçan, ndërsa e krahasoi në mënyrë banale me “huliganët ballkanikë të futbollit” ministrin kosovar të Punëve të Brendshme, duke përmendur disa grupe të tifozëve shqiptarë.
Ministri i Punëve të Brendshme të Kosovës, Xhelal Sveçla, njoftoi të enjten se kanë hequr një billbord të madh në Zveçan, ku ishin shfaqur fotografi të personaliteteve të ndryshme serbe dhe ruse, përfshirë presidentin e Serbisë dhe Rusisë – Aleksandër Vuçiç dhe Vladimir Putin – nën arsyetimin se simbole të personatve që kanë qasje agresive ndaj Kosovës nuk do të lejohen.
“Askush nuk e priste që Sveçla të jepte diçka më të mirë për qytetarët e Kosovës, përveçse të shkatërrojë billborde. Çfarë mënyrë të shkëlqyer zgjodhi për t’ia kujtuar të gjithëve se kjo është e gjëja e vetme në të cilën është i zoti”, shkroi ai, ndërsa postoi një foto të vjetër ku shihet Sveçla duke demoluar veturat e EULEX-it gjatë një proteste të Lëvizjes Vetëvendosje në Prishtinë.
“Mënyra se si shkatërroi i vetëm veturat e EULEX-it në Kosovë, do ta kishin zili të gjithë huliganët ballkanikë të futbollit – nga KF Ballkani i Suharekës, Intelektualët e KF Dritës deri te Ballistët famëkeq të Shkëndijës së KF Tetovës. Përpara udhëheqës dhe hero i madh!”, shtoi ndër të tjera ambasadori serb në Uashington, i cili ndryshe njihet si korrieri i propagandës serbe.
E përveç presidentit serb dhe presidentit rus, në billbordin e hequr të enjten nga autoritetet kosovare, janë parë edhe fotografitë e diplomatit serb, ish-drejtor i të ashtuquajturës “Zyrë për Kosovën” në Qeverinë e Serbisë dhe tenistit serb, Novak Gjokoviç, i cili njihet për thirrjet nacionaliste kundër shqiptarëve të Kosovës dhe mohon gjenocidin serb në Bosnje-Hercegovinë.
