Swoboda e vlerëson si çmenduri serbe moslejimin e boksierëve kosovarë në Botëror

Hannes Swoboda, ish-eurodeputet dhe anëtar i Këshillit Evropian për Marrëdhënie me Jashtë, ka folur edhe për rolin e SHBA-së në dialogun ndërmjet Kosovës dhe Serbisë.

Austriaku në një intervistë në Interaktiv, tha se me administratën Biden, po sheh një angazhim më të madh të SHBA-së për të zgjidhur çështjen e Kosovës.

“Pikësëpari amerikanët janë më aktivë tani, në mënyrë më të sofistikuar, me njerëz me shumë përvojë që janë nominuar për ambasadorë në këto shtete. Kjo duhet shfrytëzuar nga BE-ja për të qenë më të jetë më aktive e më e fortë. Së bashku BE-ja dhe SHBA-ja mund të bëjnë më shumë”, ka thënë ai.

Ai ka folur edhe për rëndësinë e ngritjes së zërit të protestës nga rinia dhe shoqëria civile në Serbi dhe Kosovë. Ka marrë shembull edhe rastin kur boksierëve kosovarë i u ndalua hyrja në Serbi për të marrë pjesë në botërorin që po mbahet në Beograd.

“E dyta, sigurisht, të gjithë të rinjtë, e gjithë shoqëria civile, nga Serbia, nga Kosova, nga ana shqiptare, nga ana serbe, duhet të protestojnë kundër këtij veprimi, siç është moslejimi i pjesëmarrjes së sportistëve nga Kosova. Mendoj që na duhet protestë më e zëshme kundër kësaj, sepse është e absolutisht e pakuptimtë. Është veprim tipik burokratik dhe veprim i çmendur nga ana serbe. Ndoshta ka edhe nga anët e tjera, por mendoj që veçanërisht të rinjtë duhet të luftojnë për një të ardhme më të mirë. Nuk ka të ardhme mënyra se si Vuciqi po e trajton Kuvendin. Kjo është katastrofë e BE-ja dhe SHBA-ja duhet ta bëjnë shumë të qartë që këto veprime nuk mund të pranohen në një botë të civilizuar”, ka thënë diplomati austriak.