Gjatë mbrëmjes të së martës u raportua se në komunat veriore të Kosovës targave u janë mbivendosur afishe serbe, përkatësisht me akronime KM e të tjera dhe llogo shtetërore serbe sipas formateve të lëshuara nga Ministria e Punëve të Brendshme të Serbisë.
Një gjë të tillë e konfirmoi për Albanian Post edhe Drejtori i Policisë së Kosovës në Mitrovicën e Veriut, Besim Hoti.
Hoti tha se “nuk është ndonjë gjë tragjike” dhe se Policia e Kosovës gjendet në vendin e ngjarjes.
“Gjatë natës kanë filluar të vendosen, dhe nuk është ndonjë gjë tragjike. Policia është në vendin e ngjarjes dhe pasi të kthehen policia do të kontaktojmë me prokurorinë”, ka thënë Hoti përmes një përgjigje për AP.
Qeveria e Kosovës ka marrë vendim për ndalimin e targave të paligjshme për veturat të cilat janë të regjistruara paligjshëm me targa të Serbisë, dhe ka ofruar afat deri në fund të gushtit për regjistrimin në targa të Republikës së Kosovës (RKS).
