Tarifat për Groenlandën, Macron i kërkon BE-së t’i kundërpërgjigjet SHBA-së

Presidenti francez Emmanuel Macron do të kërkojë aktivizimin e instrumentit anti-shtrëngim të Bashkimit Evropian, pasi Presidenti i SHBA-së Donald Trump njoftoi tarifa të reja për vendet evropiane për shkak të Groenlandës.

Macron, i cili të shtunën e quajti kërcënimin e tarifave “të papranueshme”, ishte në kontakt me homologët evropianë dhe do ta bënte kërkesën në emër të Francës, sipas një burimi pranë presidentit.

Trump njoftoi një tarifë prej 10% për mallrat nga tetë vende evropiane, përfshirë Francën, duke filluar nga 1 shkurti. Ai kërcënoi në një postim në rrjetet sociale se do ta rriste tarifën në 25% në qershor, përveç nëse dhe derisa “të arrihet një marrëveshje për blerjen e plotë dhe totale të Grenlandës”.

Ambasadorët kombëtarë të BE-së do të takohen këtë të dielë për të diskutuar hapat e mëtejshëm të bllokut, sipas raportimeve nga mediat ndërkombëtare.

Instrumenti anti-shtrëngim i BE-së është mjeti më i fuqishëm hakmarrës i bllokut. Ndonëse nuk është përdorur kurrë, ACI është hartuar kryesisht si një pengesë, dhe nëse është e nevojshme, për t’iu përgjigjur veprimeve të qëllimshme shtrënguese nga vendet e treta që përdorin masat tregtare si një mjet për të ushtruar presion mbi zgjedhjet politike të BE-së ose anëtarëve të saj.

Këto masa mund të përfshijnë tarifa, taksa të reja mbi kompanitë e teknologjisë ose kufizime të synuara mbi investimet në BE. Ato gjithashtu mund të përfshijnë kufizimin e aksesit në pjesë të caktuara të tregut të BE-së ose kufizimin e firmave nga ofertimi për kontrata publike në Evropë.

Sipas pran Macron, plani i Trump për të vendosur tarifa mbi Groenlandën vë në pikëpyetje vlefshmërinë e marrëveshjes tregtare të nënshkruar vitin e kaluar midis BE-së dhe SHBA-së. Kjo marrëveshje është zbatuar tashmë pjesërisht, por ende ka nevojë për një miratim nga parlamenti, i cili tani ka të ngjarë të ndalojë miratimin.