Presidenti i Kosovës, Hashim Thaçi ka folur për takimet që ai kishte gjatë qëndrimit në Uashington. Thaçi ka thënë se Kosova duhet ta shfrytëzoj këtë momentum nga Uashingtoni për të arritur marrëveshjen finale me Serbinë.
Thaçi këto komente i ka bërë në diskutimin publik “Rruga drejt Komisionit për të Vërtetën dhe Pajtimin në Kosovë”. Nga aty Thaçi ka thënë se nisma për Komisionin për të Vërtetën dhe Pajtimin ishte e duhur edhe pse kanë kaluar më shumë se dy dekada nga përfundimi i luftës.
Ai është shprehur i bindur se nën udhëheqjen e Donald Trump dhe siç ka thënë dinamikës dhe mençurisë së Grenell, Kosova dhe Serbia do të arrijnë marrëveshjen finale që do të sjellë njohjen reciproke, shkruan Reporteri.net.
“Nisma ishte e duhur edhe pse kanë kaluar më tepër se dy dekada nga përfundimi i luftës. Nga rezultatet e hulumtimit del se qytetarët duan të dinë se çfarë ka ndodhur me luftë. Kjo marrëveshje duhet të sjellë njohjen reciproke si dhe rrugëtim më të përshpejtuar në NATO dhe BE. Takimi i Uashingtonit dy ditë më parë mes Kosovës e Serbisë mendoj se do të jetë takim i kthesës pozitive, që nën udhëheqjen e Trump, dinamikës dhe mençurisë së Grenell të arrihet marrëveshja në të ardhmen e afërt. Prandaj këtë momentum dhe mundësi nga Uashingtoni duhet ta shfrytëzojë edhe Kosova, edhe Serbia si garancë për paqë në tërë Ballkanin Perëndimor. Është e një rëndësie jetike për procesin e marrëveshjes përfundimtare që të dy palët kanë besim në liderishipin e Amerikës që përmes tyre mund të arrihet marrëveshja përfundimtare”, është shprehur Thaçi ndër të tjera.
