Vetëm deri në muajin shtator të këtij viti, Forcën e Sigurisë së Kosovës e kanë lënë 68 ushtarë dhe 10 të tjerë rezervë – gjithsej 78 pjesëtarë. Kjo shifër është trefish më e madhe se numri i pjesëtarëve që ishin larguar në vitin 2019. Këto janë të dhënat që i ka siguruar gazeta Nacionale nga FSK-ja, bazuar në Ligjin për Qasje në Dokumente Publike. Nacionale e sjell edhe rrëfimin e një ushtari që u largua nga ushtria e Kosovës në muajin prill.
Edon Morina për 12 vjet kishte shërbyer në Forcën e Sigurisë së Kosovës. Përgjatë gjithë kësaj kohe, ai u gradua vetëm një herë. Kolegët e tij, brenda të njëjtës periudhë, u avancuan deri në katër herë. Për këto arsye e padrejtësi të tjera, Morina thotë se vendosi që ta braktiste ushtrinë e Kosovës.
Në një rrëfim për gazetën Nacionale, Morina ka treguar se në FSK mungon mirëqenia për ushtarët dhe se kërkesat e ankesat e tyre asnjëherë nuk shqyrtohen.
“Unë jam pranuar në vitin 2010. 12 vjet kam shërby në FSK. Unë jam kanë Tetar Specialist, kam shërbyer në Kazermën Evropianët e Lirë. Veç një shkallë e kam kaluar, për 12 vjet, sepse nuk kam pasur të njofshëm. Kurse në raste tjera kanë kaluar deri në OR 6 tash”, ka theksuar ai.
“Gjithë kena shkru ankesa, qeky është problemi më i madh në FSK. Ankesa e një ushtari nuk merret parasysh, këtu është problemi”, ka treguar Morina.
Ai ka theksuar se po të merren parasysh kërksat e ushtarëve, gjendja aty do të ishte më e mirë.
“E kam lanë se nuk ka pas mirëqenie të ushtarëve. Mirëqenia e ushtarakëve që mungon aty, e bën njerin me lëshu ushtrinë. Kushtet financiare normal që tani hyjnë në pyetje, në atë sekondë që pranohemi si ushtar krejt pranojme me qatë rrogë, sikur që është edhe tash. Mirëpo nëse vazhdon mosrespekti, senet me të njofshëm, mos-mirëqenia, normalisht që kanë me lëshu. Edhe rroga është njëra prej motivimit”, tha më tutje Morina.
Edon Morina tregon se si është jeta e tij tash dhe për mallin që e ka ende për uniformën e ushtrisë.
“Jeta jem qetash është njëqindfish më e qetë. E kam rritë eksperiencën, kam qenë në pozicion të mirë. Qaq shumë krenar jam që kam shërby, edhe jashtë saj jam krenar, e kam ble uniformën veç me e pasë në shtëpi për qejf”, tregon ai për gazetën Nacionale.
Në fund, Edon Morina, ish-pjesëtar i FSK-së, ka kërkuar nga institucionet që të mos i neglizhojnë asnjëherë kërkesat e ushtarëve, sidomos atyre që janë të rinj.
Largime masive
Gazeta Nacionale, bazuar në Ligjin për Qasje në Dokumente Publike, i ka siguruar të dhënat nga Forca e Sigurisë së Kosovës në lidhje me largimet e ushtarëve. Ajo që mund të konstatohet qysh në fillim, është se, për dallim nga viti 2020, deri në muajin shtator të këtij viti është trefishuar numri i ushtarëve që janë larguar vullnetarisht nga ushtria.
Në vitin 2020, numri i ushtarëve që janë larguar vullnetarisht nga Forca e Sigurisë së Kosovës ishte 19. Vetëm një vit më pas, numri i tyre shkoi në 50. Kurse në vitin 2022, deri në këtë kohë, janë larguar vullnetarisht 68 pjesëtarë të FSK-së dhe 10 të tjerë rezervë. Pra, deri në muajin shtator, vetëm këtë vit janë larguar 78 ushtarë nga Forca e Sigurisë së Kosovës.
Bazuar në të dhënat e siguruara nga Nacionale, 52 pjesëtarë gjatë këtij viti janë larguar si pensionistë të rregullt, ndërsa katër të tjerë si pensionistë të parakohshëm. Dhjetë janë larguar me vendim të bordit disiplinor, një ka vdekur, kurse katër të tjerë janë shkarkuar.
Në përgjithësi, për të gjitha arsyet, pa dallim, të numëruara më sipër, FSK-ja në vitin 2022 ka 180 ushtarë më pak.
Largimet nga FSK-ja i ka konfirmuar edhe ish-pjesëtari Edon Morina. Ai tregon se vetëm në njësinë e tij, brenda muajit, ishin larguar pesë pjesëtarë.
“Numri që po largohet është i madh. Veç në njësinë time, për 15 ditë e kena lëshu tre vetë, për një muaj pesë. Unë mendoj që arsyeja kryesore është mos-mirëqenia e pjesëtarëve dhe nuk merren parasysh ankesat e kërkesat e tyre”, ka thënë Edon Morina për Nacionalen.
Përveç për padrejtësi, një numër i madh i largimeve vullnetare kanë të bëjë edhe me emigrimin e ushtarëve jashtë vendit. Kjo çështje ishte paraqitur disa herë në Kuvend, por edhe në Komisionin për Siguri.
