Trump dhe Putin “rikrijojnë” një moment të Luftës së Ftohtë: Fotoja që ngjan me përplasjen Nixon-Hrushov

Në shikim të parë, fotografia e fundit mes Donald Trump dhe Vladimir Putin ngjall menjëherë kujtime nga një tjetër epokë tensioni mes SHBA dhe Rusisë — Lufta e Ftohtë.

Pamjet e ngjashme sjellin ndër mend “Debatin e Kuzhinës” të vitit 1959, ku zëvendëspresidenti amerikan i asaj kohe, Richard Nixon, u përplas verbalisht me liderin sovjetik Nikita Hrushov, në një panair në Moskë.

Në foton ikonike, Nixon shihet teksa i drejton gishtin Hrushovit në një debat të nxehtë për fuqinë dhe përparimin teknologjik të dy vendeve.

Ndërkohë, në foton e re, Trump duket i përqendruar dhe me një shprehje të prerë në fytyrë, ndërsa i drejton gishtin presidentit rus, Putin.

Midis tyre qëndron një përkthyes, i tensionuar, ashtu si edhe në imazhin historik.

Megjithatë, ndryshe nga përplasja reale Nixon-Hrushov, situata mes Trump dhe Putin mbetet më e paqartë dhe e mbuluar nga retorika politike e sotme.

Por fotoja ka ngjallur menjëherë reagime dhe krahasime në rrjete sociale, duke rikthyer simbolikën e marrëdhënieve të ftohta SHBA-Rusi.

Por atmosfera në samitin e fundit në Alaska mes Donald Trump dhe Vladimir Putin ishte krejt tjetër. Putini nuk erdhi për të kundërshtuar kapitalizmin, por për ta përkëdhelur Trump-in, duke e quajtur “udhëheqës vizionar” dhe duke pretenduar se fitorja e tij në zgjedhjet e 2020-s iu vodh përmes mashtrimit me votat postare.

Në fakt, ishte Trump ai që paralajmëroi për pasoja nëse nuk arrihej një armëpushim në Ukrainë, por kur Putini nuk pranoi kushtet, kërcënimet u tretën mes përshëndetjesh të ngrohta.

Historikisht, krahasimi më i afërt është takimi i John F. Kennedy me Hrushovin në Vjenë në vitin 1961 – një përballje ku Kennedy u pa i papërgatitur dhe doli i dobët. Edhe ai vetë e pranoi: “Gjëja më e keqe në jetën time… ai më sulmoi ashpër”.

Por ndryshimi themelor është i madh. Gjatë Luftës së Ftohtë, udhëheqësit sovjetikë dhe amerikanë u përballën me njëri-tjetrin përmes një ndarjeje të madhe ideologjike. Sot, të dy presidentët japin përshtypjen se qëndrojnë në të njëjtën anë,shkruan Telegraf.