Trump nis numërimin mbrapsht, Rusia ka 10 ditë kohë të arrijë paqen me Ukrainën

Presidenti amerikan, Donald Trump, ka nisur zyrtarisht numërimin mbrapsht.

Moska ka 10 ditë kohë për të arritur një armëpushim dhe paqen në Ukrainë. Përndryshe, vendi do të goditet nga sanksione të fuqishme amerikane.

Presidenti amerikan, Donald Trump, ia ka shkurtuar ndjeshëm afatin për të arritur një marrëveshje paqeje me Ukrainën presidentit rus, Vladimir Putin, duke thënë një ditë më parë se ai do të priste vetëm 10-12 ditë për këtë dhe më tej, do të veprojë.

Kështu theksoi vetë Trump, teksa foli për gazetarët në hyrje të një takimi me kryeministrin britanik, Keir Starmer.

Tashmë, afati është i qartë: 10 ditë duke filluar nga 29 korriku, asnjë më shumë!

Më parë, Sekretari i Shtetit, Marco Rubio, përmendi se Trump po bëhet “gjithnjë e më i frustruar” me mungesën e përparimit të Rusisë drejt një marrëveshjeje paqeje dhe tani po kërcënon me penalitete të rënda ekonomike.

Ai foli të dielën me Lara Trump në Fox News rreth kësaj çështjeje.

Një transkript i intervistës u nda nga Departamenti i Shtetit të dielën në mëngjes.

Rubio deklaroi se përparësia kryesore e Trump është përfundimi i “konfliktit”, duke theksuar: “Nuk është lufta e tij… Ai e trashëgon atë dhe ka bërë gjithçka që është e mundur për ta çuar atë në një fund”.

Megjithatë, pavarësisht asaj që Rubio e përshkroi si “ndërveprime shumë të mira” me presidentin rus Vladimir Putin në telefonata, këto diskutime vazhdimisht kanë dështuar të japin rezultate.

Trump, tha ai, “po humbet durimin”.

“Presidenti amerikan po humbet gatishmërinë për të vazhduar të presë që pala ruse të bëjë diçka këtu për t’i dhënë fund kësaj… lufte”, tha Rubio, duke shtuar se Trump tani po shqyrton masa drastike, duke përfshirë vendosjen e tarifave 100 për qind ndaj Rusisë nëse nuk arrihet një marrëveshje paqeje brenda 50 ditëve.

Diplomati më i lartë theksoi gjithashtu koston brutale njerëzore të luftës, duke vënë në dukje se “mbi 100 mijë ushtarë rusë – vetëm në anën ruse – janë vrarë” që nga janari i këtij viti.

Ai akuzoi Rusinë se po përdor “taktika vonese” për të zgjatur luftën.

“Ai nuk do të bjerë në atë kurth, të tërhiqet në bisedime të pafundme për bisedime”, pohoi Rubio, duke ia atribuar qëndrimin e ashpër të Trump përvojës së tij dekadash në trajtimin e “njerëzve të pamëshirshëm në biznes”.

Rubio e karakterizoi Trump-in si “eksperti i finalizimeve” së administratës, i cili shkëlqen në mbylljen e negociatave komplekse.

“Ai 5 përqindshi i fundit, ato pak jardë të fundit, janë gjithmonë më të vështirat në çdo negociatë”, shpjegoi ai.