Trump shpërndan postimin ku i kërkohet Zelenskyt “të tërhiqet dhe të pranojë kushtet e SHBA-së për t’i dhënë fund luftës në Ukrainë”

Donald Trump ka shpërndarë një postim në rrjetet sociale duke i kërkuar Volodymyr Zelenskyt të “tërhiqet” dhe të pranojë kushtet e SHBA-së për t’i dhënë fund luftës në Ukrainë.

Presidenti i SHBA-së ripostoi një opinion nga Michael McCune në platformën e tij sociale Truth Social, i cili tha se presidenti ukrainas nuk do të ketë “zgjidhje tjetër veçse të tërhiqet dhe të pranojë kushtet e Trump”, shkruajnë mediat e huaja.

Kjo pason një takim intensiv midis Trump dhe Zelensky në Shtëpinë e Bardhë të premten.

Postimi vazhdon: “Por këtu është pjesa gjeniale – Trump në fakt po mbron Ukrainën pa e tërhequr SHBA-në në luftë”.

“Duke negociuar një marrëveshje mineralesh, Trump siguron që amerikanët do të përfshihen në industrinë minerare të Ukrainës. Kjo e pengon Rusinë të nisë një pushtim sepse sulmi ndaj Ukrainës do të nënkuptonte rrezikimin e jetëve amerikane – diçka që do të detyronte SHBA-në të përgjigjet”.

“Trump i lavdëroi të dyja palët si një lojtar shahu. Në fund, Zelesnky nuk do të ketë zgjidhje tjetër veçse të pranojë, sepse pa mbështetjen e SHBA-së, Ukraina nuk mund të fitojë një luftë të zgjatur kundër Rusisë”.

“Dhe sapo kompanitë amerikane të kenë operacione minerare në Ukrainë, Putini nuk do të jetë në gjendje të sulmojë pa shkaktuar pasoja masive ndërkombëtare. Mos e nënvlerësoni Donald Trump. Në këtë lojë shahu, ai është 10 hapa përpara të gjithëve”.

Presidenti amerikan pretendoi se Zelensky “po bënte bixhoz me Luftën e Tretë Botërore” në një seri shkëmbimesh tensionuese të premten, të cilat u transmetuan në mbarë botën.

Udhëheqësi i Ukrainës u akuzua gjithashtu se nuk ishte mjaft mirënjohës për ndihmën ushtarake të SHBA nga presidenti amerikan dhe zëvendësi i tij JD Vance.

Kjo edhe pse publikisht falënderoi SHBA-në në mënyrë të përsëritur pas fillimit të luftës në vitin 2022.

Takimi përfundoi me Zelenskyn që thuhet se “u dëbua” nga Shtëpia e Bardhë dhe me “anulimin” e planeve për të nënshkruar një marrëveshje për shkëmbimin e të drejtave të mineraleve të Ukrainës për armët amerikane.