Fshati i gurtë i Rehovës, vetëm 2 kilometra larg Ersekës, njihet për turizmin unik e të veçantë. Pothuajse gjithë shtëpitë aty janë kthyer në bujtina, ku vet banorët duan të qëndrojnë me turistët e huaj, të gatuajnë me ta, të tregojnë historinë e fshatit.
Këtë fundjavë, një grup francez po qëndron në shtëpinë e Lavdies, njëra nga gratë që derën e shtëpisë e mban gjithmonë hapur për turistët.
“Ne kemi disa ditë që po jetojmë si kolonjare në Rehovë. Erdhëm dhe vjet këtu dhe na pëlqen, sidomos qetësia që gjejmë, pamja e Gramozit, ushqimet bio dhe gatimet, ku edhe ne e ndihmojmë gruan e shtëpisë këtu”, shprehet një turiste franceze.
“Është mbase një nga vendet më të bukur në botë, sipas meje. Këtu mund të gjesh gjithçka, por dua të veçoj historinë që Rehova ka dhe çmimet shumë të lira. Këtu mund të vijë kushdo e të pushojë”, thotë një tjetër.
“Është hera e tretë që vij në Shqipëri dhe gjithmonë vij qëndroj më shumë ditë në Rehovë. Arsyeja është e thjeshtë. Këtu vërtet çlodhesh. Këtu mund të bësh hiking, mund të shohësh kishat e ndryshme, mund të vizitosh muzeun ne qytet, mund të mësohesh të bëhesh pak shqiptar”, shprehet një tjetër turist.
E zonja e shtëpisë tregon se çfarë u pëlqen më shumë francezë për të ngrënë, nga buka e bërë në mënyrë artizanale deri në ëmbëlsirat e ndryshme.
Vitet e fundit Kolonja po kthehet në një destinacion të rëndësishëm të turizmit natyror si edhe për trashëgiminë kulturore që ofron deri tek sportet e aventurës.
