Tusk: SHBA zotohet se do veprojë ushtarakisht nëse Rusia shkel armëpushimin

Kryeministri polak Donald Tusk tha se SHBA-të premtuan një përgjigje ushtarake për herë të parë nëse Rusia shkel marrëveshjen e armëpushimit.

“Për herë të parë dëgjova nga goja e negociatorëve amerikanë se Amerika do të përfshihet në garancitë e sigurisë për Ukrainën në një mënyrë të tillë që rusët nuk do të kenë dyshim se në rast të shkeljes së armëpushimit përgjigja amerikane do të jetë ushtarake nëse rusët sulmojnë përsëri Ukrainën”, u tha Tusk gazetarëve ndërsa po largohej nga Gjermania.

Deklaratat e tij erdhën pas bisedimeve të paqes në Berlin, ku morën pjesë përfaqësues të SHBA-së, Ukrainës dhe vendeve të ndryshme evropiane.

Në një deklaratë të lëshuar të hënën, udhëheqësit evropianë thanë se kishin rënë dakord të punonin së bashku me SHBA-në dhe Ukrainën “për të arritur një paqe të qëndrueshme që ruan sovranitetin ukrainas dhe sigurinë evropiane”.

“Ajo që është një përparim – në asnjë mënyrë një garanci suksesi – është fakti se ndoshta për herë të parë ishte kaq qartë e dukshme se amerikanët, evropianët dhe Ukraina janë në të njëjtën anë. Një Ukrainë e kërcënuar me një agresion të ri përbën një rrezik të madh për Poloninë dhe ato vende pranë frontit”, tha gjithashtu Tusk, duke kërkuar garanci sigurie.

Ai tha se amerikanët ishin të bindur për aftësinë e tyre për të ndërtuar garanci të forta sigurie me pjesëmarrjen e SHBA-së.

Tusk përsëriti gjithashtu se trupat polake nuk do të merrnin pjesë në asnjë mision të mundshëm paqeruajtës në Ukrainë, duke theksuar se Polonia do të mbështeste në vend të kësaj Koalicionin e të Gatshmëve me mjete të tjera.

“Ne kemi qenë shumë të qartë për këtë çështje dhe kjo nuk është për shkak të mungesës së vendosmërisë apo guximit. Polonia ka detyra të tjera. Ne duhet të sigurojmë krahun lindor”, shpjegoi ai.