Ushtria ukrainase ka njoftuar këtë të shtunë se ka kryer një sulm me raketa ndaj një fabrike ruse që prodhon raketa balistike, në rajonin e largët të Udmurtias. Objektivi ishte uzina në qytetin Votkinsk, e njohur për prodhimin e raketave me rreze të shkurtër Iskander dhe ndërkontinentale Topol-M, rreth 1 mijë e 400 kilometra larg kufirit ukrainas.
Në një deklaratë në aplikacionin Telegram, ushtria ukrainase tha se kishte përdorur raketa lundrimi Flamingo, të prodhuara në vend. Sulmi shkaktoi një zjarr në vendngjarje, sipas ushtrisë ukrainase.
Guvernatori i rajonit Udmurtia, Alexander Brechalov, më herët kishte thënë se një objekt ishte sulmuar gjatë natës me dronë.
“Ka pasur dëme dhe të lënduar si rezultat,” tha Brechalov në një video të postuar në Telegram, pa dhënë detaje të tjera, citon Reuters.
Autoriteti rus i aviacionit civil, Rosaviatsiya, njoftoi se aeroporti në qytetin kryesor të Udmurtias, Izhevsk, si dhe aeroportet në rajonet përreth, i pezulluan operacionet.
Kanali jozyrtar rus në Telegram, SHOT, i cili shpesh citon burime nga shërbimet e sigurisë, raportoi se banorët në Votkinsk dëgjuan të paktën tre shpërthime dhe zhurmën e dronëve.
Rusia përdor raketat e saj balistike për të forcuar sulmet me dronë ndaj infrastrukturës energjetike të Ukrainës, duke ndërprerë furnizimin me energji elektrike dhe ngrohje për miliona njerëz gjatë muajve të ftohtë të dimrit.
Ukraina po synon gjithnjë e më shumë infrastrukturën ushtarake dhe energjetike brenda territorit rus. Kievi thotë se goditja e prodhuesve të armëve dhe sistemit energjetik që ushqen ushtrinë ruse është mënyra më e mirë për të fituar avantazh ndaj armikut më të madh, ndërsa lufta hyn në vitin e saj të pestë javën e ardhshme.
Ushtria ukrainase tha gjithashtu se kishte goditur një uzinë përpunimi gazi në rajonin rus të Samarës. Zyrtarët rusë në Samara nuk raportuan për një sulm të tillë.
Nuk ka pasur kuorum për raundin e parë të votimit të Presidentit. 66 deputetë ishin…
Nuk ka pasur kuorum për propozimet e amendamenteve kushtetuese të propozuara nga presidentja Vjosa Osmani…
Televizioni shtetëror iranian raportoi mbrëmjen e së enjtes se dronët e Gardës Revolucionare ushtria ideologjike…
Deputetët e Kuvendit të Kosovës janë ftuar në seancën lidhur me amendamentet për zgjedhjen e…
Presidenti i Shteteve të Bashkuara, Donald Trump, ka thënë se dëshiron të përfshihet në zgjedhjen…
Presidentja Vjosa Osmani ka njoftuar se të enjten i ka dërguar në Kuvend amendamentet kushtetuese…