Ministria e Punëve të Brendshme të Ukrainës lëshoi një mesazh dërguar publikut nga ushtari rus Andrei Pozdayev.
Ukrainasit mbajtën konferencë shtypi në të cilën folën ushtarët rusë të kapur nga forcat ukrainase, përcjell Gazeta Express.
Në Facebook, ministria ukrainase veçoi një mesazh nga ushtari Pozdayev, i cili thuhet se tha se askush nuk duhet të shkonte në Ukrainë, se nuk ka fashistë atje dhe se njerëzit po vdisnin nën granatat ruse.
Ai fillimisht tregoi se si përfundoi në Ukrainë.
“Ata na premtuan se nuk do të shkonim në Ukrainë, sepse tashmë kishte zëra për një luftë të mundshme këtu. Dhe në mëngjesin e 24 shkurtit na rreshtuan dhe na thanë se ishim në territorin ukrainas. Unë u plagosa. Automjeti ynë mjekësor ishte në fund të autokolonës. Por ne ngecëm në rrugë dhe komanda nuk na priste. Mundëm të arrinim në kolonë, por ata na kapën afër Sumy. Togeri tha se ishim të plagosur dhe u kërkoi atyre të mos qëllonin. Ne i dorëzuam armët tona dhe u dërguam në Sumy”, thanë ukrainasit, duke cituar fjalët e një rekruti rus të dërguar në Ukrainë.
Ai shtoi se ata janë trajtuar mirë në robëri.
“Ukrainasit po na mbrojnë gjithashtu nga sulmet ajrore ruse, jo vetëm veten e tyre. Unë dua t’u drejtohem qytetarëve të shqetësuar të Rusisë – askush nuk duhet të vijë këtu, nuk ka fashistë këtu, njerëzit thjesht po vdesin nga granatimet tona”, tha ushtari rus, siç njoftoi Ministria e Brendshme e Ukrainës.
