Vazhdojnë kërkimet për të dyshuarin për vrasjen në tentativë në Fushë Kosovë, Policia ia bastis shtëpinë

I dyshuari për vrasjen e rëndë në tentativë ndaj dy grave, M.A., 44-vjeçare dhe nënës së saj, F.G., 64-vjeçare, Sabit Islami, është shpallur në kërkim policor pas arratisjes së tij nga vendi i ngjarjes në Fushë Kosovë.

Sinjali mëson se në kuadër të veprimeve hetimore, Policia e Kosovës në koordinim me Prokurorinë Themelore kanë kryer bastisje në shtëpinë e Islamit në fshatin Nakaradë, mirëpo i njëjti nuk është hasur aty.

Me qëllim që t’i privojë nga jeta, Islami dyshohet se ka shtënë tri herë me armë në drejtim të 64-vjeçares, e cila sipas mjekut kujdestar në Emergjencën e QKUK-së, ka pësuar lëndime serioze, por që është jashtë rrezikut për jetë.

Burimet e Gazetës Sinjali brenda Emergjencës kanë bërë me dije se 44-vjeçarja ka marrë plagë në të dy duart, ndërsa 63-vjeçarja është dërguar atje në gjendje të rëndë për shkak të plagëve që kishte marrë në bark dhe këmbë.

Pas intervenimit të stafit mjekësor, gjendja e viktimës M.A., është stabilizuar dhe është jashtë rrezikut për jetë, ndërsa për shkak të gjendjes më serioze, 64-vjeçarja i është nënshtruar një intervenimi kirurgjik.

Në vendin e ngjarjes kanë dalë njësitë policore të cilët kanë kryer ekzaminimet e nevojshme që ndihmojnë në zbardhjen e rrethanave të rastit. Po ashtu ata kanë marrë të gjitha veprimet hetimore që sa më shpejt të lokalizohet vendndodhja e të dyshuarit dhe të bëhet arrestimi i tij.
Me urdhër të prokurorit, rasti është cilësuar ‘Vrasje e rëndë në tentativë’ dhe Islami do të hetohet edhe për ‘Mbajtje në pronësi, kontroll ose posedim të paautorizuar të armës’.