Venezuela liron të burgosur politikë, mes tyre edhe nga Shqipëria

Venezuela ka liruar disa shtetas të huaj të ndaluar në vend, mes tyre edhe shtetas shqiptar, bëri të ditur të premten ministri i Jashtëm i Çekisë, Petr Macinka.

Sipas deklaratës së tij, një shtetas çek, i arrestuar në vitin 2024 nga autoritetet venezuelase nën akuza për përfshirje në një komplot për rrëzimin e qeverisë dhe vrasjen e presidentit të atëhershëm Nicolás Maduro, u lirua së bashku me të burgosur nga Irlanda, Rumania, Gjermania, Shqipëria, Ukraina dhe Holanda.

Qeveria çeke i ka hedhur poshtë akuzat ndaj shtetasit të saj, duke i cilësuar ndalimet si të paligjshme dhe pa një proces të rregullt gjyqësor. Edhe një organizatë venezuelase për të drejtat e njeriut ka deklaruar se ndalimi ishte i motivuar politikisht.

Macinka tha se lirimi erdhi pas disa javësh negociatash intensive, ndërsa autoritetet venezuelase nuk kanë dhënë detaje të mëtejshme mbi statusin apo numrin e përgjithshëm të të liruarve.

Ndërkohë, edhe një shtetas hungarez, i arrestuar si pjesë e ekuipazhit ndërkombëtar të një anijeje kërkimore, është liruar, sipas ministrit të Jashtëm të Hungarisë.
Venezuela ka deklaruar se këtë javë ka liruar mbi 400 persona, megjithatë organizatat për të drejtat e njeriut vënë në dyshim këtë shifër.