Është vetëdorëzuar në Polici, 23-vjeçari Azgan Mërnica, i cili akuzohet se dy ditë më parë ekzekutoi me armë zjarri efektin e forcave “Shqiponja” Novruz Cenalia, 28 vjeç, në fshatin Baltëz të Fierit.
Ai ka qenë i shoqëruar nga një i afërm i tij dhe është vetëdorëzuar mbrëmjen e sotme në Drejtorinë e Policisë së Fierit.
Prokuroria e Fierir ka ngritur dy akuza ndaj Azgan Mërnicës, vepra penale “Vrasja e punonjësve të Policisë së Shtetit” dhe “Mbajtja pa leje dhe prodhimi i armeve, armëve shpërthyese dhe i municionit”.
Krimi dyshohet se ka ndodhur pas një konflikti të çastit mes dy të rinjëve mesditën e 13 Majit, ku shkaku dyshohet se ka qenë kalimi në një rrugë të ngushtë të fshatit.
Prej dy ditësh, Azgan Mërnica ishte në kërkim, teksa Policia kishte ofruar edhe 30 mijë euro shpërblim për këdo që jepte informacion të vlefshëm për kapjen e tij.
