Vjedhja në shtëpinë e fqiut i doli ‘dardhë me bisht’ pejanit – Ky është personi që tentoi t’ia vë zjarrin shtëpisë dhe tha se u përlesh me hajnat

Një person ka përfunduar në pranga të Policisë, pasi që tentoi të kryejë një vjedhje në shtëpinë e fqiut të tij, të mërkurën rreth orës 00:10 në fshatin Raushiq të Pejës. Por vjedhja që mendoi ta kryente i shkaktoi shumë telashe të dyshuarit, pasi që mori lëndime pasi shkaktoi zjarr brenda shtëpisë.

Burimet e Gazetës Sinjali bëjnë të ditur se personi i cili u arrestua nën dyshimet për vjedhje në shtëpinë e fqiut të tij, është Idriz Idrizi.

Sipas burimeve, Idrizi ka hyrë në shtëpinë e viktimës dhe ka tentuar që me djegien e perdeve, t’ia vë zjarrin shtëpisë. E lëndimet trupore që i mori si pasojë e prerjes në xhamin e dritares, mendoi t’i përdor si inskenim për të mbuluar veprën penale të cilën dyshohet se e kreu.

Ai kishte deklaruar se lëndimet i mori pasi kinse shkoi të përleshej me hajnat që ‘kishin hyrë’ në shtëpinë e fiqut të tij.

Ndryshe, rastin e ka konfirmuar edhe Policia e Kosovës përmes raportit 24 orësh, ku bëhet e ditur se Idrizi me vendim të prokurorit, është dërguar në mbajtje.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.