Vjosa Osmani e Edi Rama mezi e shohin me sy njëri-tjetrin

Kryeministri i Shqipërisë, Edi Rama, dhe presidentja e Kosovës, Vjosa Osmani, kanë raporte tejet të ftohta në mes veti. Një gjë e tillë është vërejtur edhe në një takim të mbajtur dje në Greqi në kuadër të Samitit SEECP (procesi i bashkëpunimit të Evropës Juglindore).

Kreu i qeverisë shqiptare ka publikuar një njoftim në profilin e tij zyrtar në “facebook”, të shoqëruar edhe me fotografi në kuadër të Samitit. Në albumin e publikuar ka fotografi të Ramës duke bashkëbiseduar me pjesëmarrësit, përfshirë edhe presidentin e Serbisë, Aleksander Vucic, derisa presidentja Osmani shihet vetëm në një fotografi, dhe atë një fotografi e përgjithshme e tryezës ku shihen të gjithë pjesëmarrësit.

Njoftim lidhur me këtë takim ka bërë edhe presidentja e Kosovës, Vjosa Osmani. Shefja e shtetit të Kosovës ka publikuar tri fotografi, e në njërën prej tyre shihet vetëm gjysma e kryeministrit të Shqipërisë, Edi Rama.

Përplasjet mes Presidentes Vjosa Osmani dhe kryeministri i Shqipërisë, Edi Rama, e kanë burimin që nga koha kur flitej për idenë e korrigjimi të kufijve mes Kosovës dhe Serbisë, me Ramën që përflitej si përkrahës dhe Osmani një kundërshtare e fuqishme. Ndërkohë përçarja mes dy politikanëve është thelluar me daljen në dritë të idesë për “Ballkanin e Hapur”, ide këtë të cilën presidentja e Kosovës s’e përkrah fare.

Në vitin 2020 si presidente në detyrë, Vjosa Osmani, ishte pritur ftohtë nga Edi Rama në një vizitë zyrtare në Tiranë. Derisa fjalimi i Osmanit i mbajtur në Kuvendin e Shqipërisë, ku kundërshtonte atë kohë të quajturin ‘minishengen Ballkanik” dhe traun e Rrugës së Kombit, kishte nxitur reagimin e kryeministrit të Shqipërisë, duke thënë se Vjosa Osmani ka bërë propagandë vetëm për vota.

“Unë mund të them që sigurisht objektivi ynë ka qenë dhe mbetet zero problemeve me fqinjët. Por zero problemeve fqinjët nuk do të thotë fshehje e problemeve ..Nuk është se ne kemi probleme, nuk kemi asnjë problem me Kosovën. Për fat të keq Kosova ka probleme me veten dhe nëse mund të bëj një përkufizim, prej disa kohësh politika e brendshme është bërë politikë e jashtme dhe ajo e jashtme është bërë e brendshme. Kjo e ka rraskapitur Kosovën. Është një problem që e shoh me shumë shqetësim e kam adresuar në mënyrë konstante në të gjitha bisedat e mia me udhëheqësit në Kosovë. Jam përpjekur edhe publikisht pa dashur të rëndoj askënd. Është tipike ajo që ndodh me qasjen ndaj Shengenit rajonal ku një nga shtylla e politikës së jashtme që ka të bëjë me politikën rajonale është bërë si kalaja e Rozafës në Kosovë. Për mua është e pakonceptueshme që një qeveri legjitime të firmosi vullnetin e shtetit të Kosovës në Shtëpinë e Bardhë për shengenin dhe një presidente në detyrë shfaqet në Shqipëri të bëjë politikë të brendshme me këtë. Akoma më grotesk është debati për traun.Paraqitet trau i pagesës së rrugës si kufi i vendosur për Kosovën. Kjo është të bësh politikë me një çështje administrative me vendin fqinj, të vish në Tiranë, të bësh propagandë për të fituar vota në Kosovë. Ai tra atje nuk është kufi mes Shqipërisë dhe Kosovës. Nëse për zonjën Vjosa atdheu është Kosova dhe Shqipëria. ky tra është në mes të atdheut dhe duhet ta paguajnë të gjithë atdhetarët”, kishte deklaruar Edi Rama.