Pasditen e të mërkurës, qyteti i Klinës është tronditur nga një ngjarje e rëndë. Dy të rinjë mbetën të vrarë pasi u gjuajtën me armë zjarri nga një person tjetër, për motive akoma të panjohura, raporton Gazeta Sinjali.
Sinjali ka raportuar ekskluzivisht se viktimat e këtij rasti janë Albison Shlivova dhe Rexhep Shlivova, të cilët janë kushërinjë, ndërkaq dorasi dyshohet të jetë 19-vjeçari, Jon Hoti.
Siç ka mësuar Sinjali, i dyshuari për këtë vrasje, Jon Hoti, është djali i ish-kandidatit të LDK-së për kryetar të Klinës, Besim Hotit.
Ai është arrestuar nga Policia dhe është duke u intervistuar në lidhje me rastin.
Gjatë ditës, Sinjali ka raportuar në vazhdimësi për vrasjen e dyfishtë.
Fillimisht u raportua se nga të shtënat më armë një person ka mbetur i vdekur dhe një i një tjetër i plagosur, i cili ishte dërguar në emergjencën e Spitalit të Pejës.
“Rreth ores 17:15 policia është njoftuar për të shtëna me armë zjarri në sheshin “Mujë Krasniqi” në një lokal sipas informatave të para një person është pa shenja jete vdekjen e ka konstatuar mjeku kujdestar, ndërsa një person tjetër është dërguar në emergjencë”, kishte thënë zëdhënësi i Policisë për rajonin e Pejës, Fadil Gashi.
Por, personi që mbeti i plagosur, nuk kishte arritur t’iu mbijetonte plagëve të marra nga arma e zjarrit dhe për pasojë kishte ndërruar jetë në emergjencën e Spitalit të Pejës.
Në vendin e ngjarjes kanë dalë njësitet policore, ekipet e emergjencës dhe po ashtu personat kompententë nga Prokuroria Themelore e Pejës.
Ndërkaq, pak minuta më vonë në vendin e ngjarjes ka arritur edhe ekipi nga Instituti i Mjekësisë Ligjore.
Në lidhje me rastin është deklaruar edhe prokurorja Sahide Gashi.
“Rast tragjik që ka marrë jetën e dy personave të ri, jemi në vazhdimësi të mbledhjes së provave, ekzaminimit të vendit të ngjarjes. Trupat e pajetë është urdhëru që të dërgohen për autopsi në IML në Prishtinë. I dyshuari edhe ai i moshës së re është arritur të arrestohet falë punës së shpejtë të policisë”, ka thënë ajo nga vendi i ngjarjes.
