Presidenti i Serbisë, Aleksandër Vuçiç, ka vlerësuar se situata për serbët që jetojnë në Kosovë është shumë e ndërlikuar dhe komplekse.
“Unë e di që pas shumë vitesh, dhe kjo ka ndodhur për dekada, shumë njerëz nuk duan as të dëgjojnë për problemet reale me të cilat po përballet populli ynë. Nuk kemi qenë kurrë në një situatë më komplekse se sot”, theksoi Vuçiç.
Ai i ka porositur serbët që mos të bien ”në provokime”.
“Qeveria e Kosovës ka dërguar njësitet e tyre paraprakisht në Jarinje dhe Bërnjak, me dëshirën që të ndalojnë të gjithë ata që kanë letërnjoftime. E gjithë kjo duhet të fillojë sonte në mesnatë, me bindjen e serbëve që të heqin dorë nga targat KM”. Disa do të thoshin se kjo nuk duhet të shkaktojë asnjë problem. Shqiptarët janë të bashkuar dhe i referohen marrëveshjes së nënshkruar nga Borko Stefanoviç dhe Edita Tahiri’’, shkruan Tanjug.
Vuçiç shtoi se shqiptarët po përpiqen t’ua imponojnë serbëve vullnetin e tyre.
“Asociacioni i Komunave me Shumicë Serbe nuk është formuar për 3390 ditë, askush nga bota nuk ka reaguar”.
“Unë kërkoj nga shqiptarët që të mos mendojnë se do të mund të bëjnë krime ndaj serbëve dhe se do të mund ta poshtërojnë Serbinë dhe popullin serb. Nëse mendojnë kështu, ju informoj se cili do të jetë rezultati”.
Kreu i shtetit serb ka potencuar se Serbia nuk provokon dhe nuk dëshiron konflikte, por ”nuk është një vend që do të mund ta fitoni lehtësisht si në kohën e Sllobodan Millosheviqit dhe Boris Tadiqit”.
Ky reagim i Vuçiç-it vije pas më 1 gusht 2022, hyn në fuqi zbatimi i vendimit të Qeverisë i datës 29 qershor, për fillimin e konvertimit të targave në ato zyrtare të Republikës së Kosovës, dhe për kalimin kufitar me fletë-deklarime të përkohshme që zëvendësojnë dokumentet e identifikimit personal nga Serbia, sikurse që shtyhet afati për mbulimin e simboleve dhe emërtimeve shtetërore serbe, për automjetet që hyjnë në territorin tonë. Afat ky që shtyhet deri më 31 tetor 2022.
Ndërsa pas mbledhjes së Këshillit të Sigurisë, Qeveria ka njoftuar se institucionet e Republikës së Kosovës qëndrojnë të përkushtuara e të bashkuara që t’i përgjigjen çdo situate të sigurisë, çdoherë në bashkërendim dhe bashkëpunim të ngushtë edhe me partnerët tanë strategjik.
