Vulinit si del e keqja me shqiptarët: Janë këmbësoria e NATO

Serbia vazhdon që të sillet si Rusia përpara nisjes së luftës në Ukrainë, duke tentuar të fabrikojë pretekste për konflikt.

Zëvendëskryeministri Aleksandër Vulin tregon që problemin më të madh e ka me shqiptarët, teksa pretendon se janë këmbësoria e NATO-s, me aleancën e fuqishme perëndimore që sipas tij është kërcënim për Serbinë.

Politikani i sanksionuar nga Amerika shkon deri aty sa thotë se kryeministri Albin Kurti po bën gjithçka në Kosovë për të provokuar Serbinë që të nisë një luftë, që më pas, sipas tij, të shfaqet NATO dhe të thotë: “Tani do ta mbrojmë ne Prishtinën’.

“Kështu e shikoj unë pranimin e të ashtuquajturës Kosovë në Asamblenë Parlamentare të NATO-s, edhe pse duhet të pranoj se ishte jashtëzakonisht logjike për mua sepse shqiptarët janë këmbësoria e NATO-s, ndaj i duhen gjithmonë që t’i çojnë si mish për top, për të pastruar fushat e minuara në Ukrainë. Kjo do të bëhet nga shqiptarët, pasi nuk do jenë belgë apo nga ndonjë shtet tjetër”, pretendon Vulin.

Ndërkohë, presidenti serb, Aleksandër Vuçiç, thotë se bota po shkon drejt një lufte të madhe. Ai pati këtë qëndrim lidhur me takimin e botës serbe.