Ndërsa situata vijon të mbetet dramatike nga koronavirusi në Kinë, i cili vijon të përhapet me shpejtësi, autoritetet janë duke punuar me ritme rekorde për ndërtimin e spitalit të ri, në Wuhan.
Spitali i ri do të ketë një kapacitet prej 1.000 shtretërish dhe pritet të jetë gati për izolimin dhe mjekimin e personave të prekur nga koronavirusi në Wuhan, epiqendra e virusit vdekjeprurës.
Makina të mëdha, përfshirë dhjetëra ekskavatorë e buldozerë nisën punën vetëm 4 ditë më parë dhe tashmë spitali ka marrë formë. Ai është parashikuar të përfundojë brenda 6 ditësh.
Ndërkohë, numri i viktimave nga koronavirusi raportohet të ketë shkuar në 106 persona, nga 81 që u raportuan një ditë më parë, ndërsa numri i të prekurve ka arritur në 4515.
