A do të tronditet tregëtia Indi-Gji nga ofendimi i Profetit Muhamed?

Lidhjet politike të Indisë me rajonin e Gjirit mund të tensionohen nga komentet fyese nga anëtarët e partisë qeverisëse të Indisë – Bharatiya Janata (BJP) kundër Profetit Muhamed, por pyetja është nëse tensionet do të ndikojnë në marrëdhëniet ekonomike që kohët e fundit kanë evoluar në lartësi të reja.

Tregtia dypalëshe midis ekonomisë së tretë më të madhe të Azisë dhe gjashtë vendeve të Këshillit të Bashkëpunimit të Gjirit (GCC) – duke përfshirë Arabinë Saudite dhe Emiratet e Bashkuara Arabe – u rrit ndjeshëm në vitin fiskal që përfundoi në mars 2022, sipas shifrave të qeverisë, duke tejkaluar 150 miliardë dollarë.

Eksportet e Indisë drejt Gjirit arritën në rreth 44 miliardë dollarë, 58 për qind më shumë se një vit më parë, dhe importoi afër 111 miliardë dollarë nga rajoni, një rritje prej 85 për qind.

Sipas paktit tregtar të Indisë me Emiratet e Bashkuara Arabe, i cili hyri në fuqi muajin e kaluar, vlera totale e tregtisë dypalëshe të mallrave pritet të rritet në më shumë se 100 miliardë dollarë dhe tregtia në shërbime në më shumë se 15 miliardë dollarë brenda pesë viteve.

Kjo dhe lëvizje të tjera, të tilla si investimet në kompanitë indiane nga fondet shtetërore saudite dhe të Emirateve të Bashkuara Arabe, shihen si maturim të lidhjeve ekonomike midis Indisë dhe Gjirit, të cilat nuk janë të lidhura vetëm me marrëveshjet dekadash të naftës.

Thirrje për bojkot të produkteve indiane

Megjithatë, hashtagët si #BoycottIndiaProducts dhe #Stopinsulting_ProphetMuhammed në Twitter dhe Facebook në vendet e Gjirit, pasi dy zëdhënës të BJP, siç u raportua në fund të muajit të kaluar, fyen Profetin Muhamed, kanë shkaktuar frikë për pasoja të mundshme ekonomike.

Kjo bëri që disa mallra indiane u tërhoqën nga raftet e një supermarketi në Kuvajt. Ndërsa një duzinë vendesh, duke përfshirë Bahreinin, Indonezinë, Jordaninë, Maldivet dhe Emiratet e Bashkuara Arabe, i janë bashkuar Afganistanit, Iranit, Kuvajtit, Omanit, Katarit dhe Arabisë Saudite në paraqitjen e ankesave zyrtare në qeverinë indiane.

Thirrja për bojkotimin e produkteve indiane u pasua nga thirrje nga disa pjesë të Indisë për të bojkotuar linjat ajrore me bazë në Gjirin Persik si Qatar Airways, sipas raporteve të mediave.

“Problemi është në imazhin (të Indisë) dhe narrativën,” tha Happymon Jacob, një profesor i marrëdhënieve ndërkombëtare në Universitetin Jawaharlal Nehru (JNU) në Delhi.

“Në nivel politik dëmi duket se është zvogëluar, nuk ka shkëmbim të vështirë mes dy palëve”, shtoi ai.

Por vendet e Gjirit do të monitorojnë protestat në Indi për fyerjet dhe do të vëzhgojnë sesi qeveria indiane do t’i trajtojë ata.

“Nëse India shihet të jetë e ashpër ndaj protestuesve vendas, në afat të gjatë mund të krijojë një narrativë negative kundër Indisë që mund të ndikojë në lidhjet ekonomike,” tha Jacob.

Ndërvarësia e Indisë dhe Gjirit

Talmiz Ahmed, një ish-ambasador i Indisë në Arabinë Saudite, Oman dhe Emiratet e Bashkuara Arabe, ra dakord se efektet ekonomike të komenteve nga tashmë ish-zyrtarët e BJP-së mund të ndiheshin për ca kohë.

Nga ana tjetër. profesori JNU i tregtisë ndërkombëtare, Biswajit Dhar thotë se çështja mund të shpëtohet nga ndërvarësia ekonomike e Indisë dhe GCC.

“Të dy rajonet janë aq të varura ekonomikisht nga njëri-tjetri sa është e vështirë të gjesh zëvendësues,” tha Dhar.

“Ata mund të jenë të kujdesshëm ndaj zhvillimeve në Indi, por nuk mendoj se do të përshkallëzohen përtej kësaj pike”, shtoi ai.

Pyetni ndonjë diplomat indian për lidhjet midis Indisë dhe Gjirit dhe ai do t’ju tregojë se të dy rajonet kanë pasur lidhje ekonomike dhe kulturore për shekuj.

Në dekadat e fundit, këto lidhje janë përcaktuar nga nevojat e Indisë për energji, shqetësimet e sigurisë dhe komuniteti i madh indian i emigrantëve.

Në vitin financiar që përfundoi në mars 2022, India importoi 212.2 milionë tonë naftë, me vlerë gati 120 miliardë dollarë. Nga kjo, pak më shumë se 60 përqind erdhën nga Gjiri, me dy furnizuesit më të mëdhenj që ishin Iraku dhe Arabia Saudite.

India gjithashtu importon gaz natyror nga Katari, furnizuesi i saj më i madh i LNG, i cili përbën më shumë se gjysmën e importeve të gazit të lëngshëm të Indisë.

Nga 32 milionë indianë jashtë vendit, 8 deri në 9 milionë janë në rajonin e Gjirit dhe ata dërgojnë rreth gjysmën e të gjitha fitimeve.