Abdixhiku e konfirmon kërcënimin për atentat: Nuk ndihem i rrezikuar, s’kam nevojë për mbrojtje të afërt

Kryetari i Lidhjes Demokratike të Kosovës, Lumir Abdixhiku, është deklaruar lidhur me raportimet për planin për atentat ndaj tij dhe tre deputetëve të partisë me të cilën udhëheq, Arben Gashi, Avdullah Hoti e Armend Zemaj.

Abdixhiku ka thënë se nuk ndihet i rrezikuar dhe se Policia e Kosovës e ka ofruar sigurinë e nevojshme, por që konsideron se nuk ka nevojë për mbrojtje të afërt.

“Nuk ndihemi absolutisht të rrezikuar, Policia e Kosovës dhe organet e tjera të rendit tashmë janë duke u marrë me këtë. Unë sot në Kuvend kam ardhur si zakonisht pa pasur nevojë për mbrojtje të afërt” , ka thënë Abdixhiku duke mos dhënë detaje më të hollësishme.

Para mediave ka folur edhe deputeti Zemaj, i cili ka pohuar ato qe ka thënë Abdixhiku dhe duke mos përmendur se kush janë kundërshtarët politik.

Ndryshe, kryetari i Lidhjes Demokratike e Kosovës, Lumir Abdixhiku dhe deputetët, Arben Gashi, Avdullah Hoti dhe Armend Zemaj dyshohet se kanë qenë cak i një kërcënimi dhe ndaj tyre është planifikuar antenat. Sipas informacioneve të para, e gjithë kjo dyshohet të lidhet me motive politike. Rasti tashmë është denoncuar edhe në Polici dhe janë marrë veprimet e nevojshme hetimore, raporton Gazeta Sinjali.

Nga Policia deklaruan për Sinjalin se janë ndërmarrë të gjitha veprimet e nevojshme policore lidhur me rastin në fjalë, teksa rasti u konfirmua edhe nga partia.

Sinjali mëson se kërcënimi ndaj kryetarit të LDK-së dhe deputetëve është zbuluar nga Shërbimi Sekret i Gjermanisë dhe i dyshuari është shqiptar.

Edhe deputeti nga radhët e Lidhjes Demokratike të Kosovës (LDK), Kujtim Shala, ka konfirmuar planin për atentat ndaj kryetarit të LDK-së, Lumir Abdixhiku.

Shala nuk ka dhënë emrat e deputetëve që ishin pjesë e kësaj liste për atentat, që sipas tij, po përgatitej nga dy organizata dhe ka të bëjë me atak politik ndaj LDK-së si kundërshtar.

Shala nuk e ka mohuar që atentati i planifikuar të jetë i lidhur me subjekte politike.

Ai ka thënë se bëhet fjalë për një rrjet njerëzish qe veprojnë në Kosovë dhe disa vende të BE-së.

E lidhur me rastin është deklaruar edhe deputeti që ishte në listën e eliminimit, Armend Zemaj, i cili ka thënë se janë në pritje të verifikimeve nga organet e sigurisë së Kosovës.

Zemaj madje ka përmendur edhe eksponentët e VV-së, për të cilët thotë se po ta dijë nëse janë të përfshirë në një mënyrë në këtë atentat, do të ju shkoj te dera e shtëpisë.