Ahmed Al-Awda, burri që mund të sfidojë sundimtarët e rinj të Sirisë!

Mediat perëndimore dhe ekspertët i janë referuar si “njeriu i Rusisë në jug” të Sirisë dhe disa e shohin atë si kërcënim potencial për sundimtarin e ri të shtetit, Ahmed al-Sharaa.

Ai quhet Ahmed al-Awda dhe emri i tij pushtoi mediat që kur u rrëzua nga pushteti qeveria e ish-udhëheqësit sirian, Bashar al-Assad, muajin e kaluar. Awda ka udhëhequr forcat rebele që kundërshtonin Assad-in në Dara, në jug të Sirisë, që në vitet e para të luftës civile, e cila nisi më 2011-ën, para se të ndryshonte aleanca dhe të bashkëpunonte me aleaten e Assad-it, Rusinë.

Teksa Hayat Tahrir al-Sham (HTS), grup i shpallur organizatë “terroriste” nga Shtetet e Bashkuara të Amerikës dhe aleatët e tyre nisën një ofensivë të shpejtë nga veriu kundër qeverisë së al-Assad/it më 27 nëntor 2024, Awda dhe luftëtarët që e mbështesin lëvizën drejt Damaskut nga jugu.

Ai është oportunist apo inteligjent dhe një lojtar pragmatik, varet nga perspektiva që e shikoni, u shpreh Robin Yassin-Kassab, bashkautor i librit me titullin: “Shtet në flakë: Sirianët në revolucion dhe luftë”.

Rebelët në jug të Sirisë

Nuk ka detaje të qarta lidhur me fillimet e Awda-s. Duke cituar njerëz të afërt me të, mediat kanë thënë se në kohën para nisjes së luftës civile në Siri, ai u largua nga shteti dhe shkoi në Emiratet e Bashkuara Arabe, pasi përfundoi shërbimin e detyrueshëm ushtarak në ushtrinë e Sirisë.

Awda, i cili raportohet se nuk kishte përvojë ushtarake përveç shërbimit ushtarak, u kthye në Dara në vitin 2012. Më 2014-ën, ai iu bashkua Ushtrisë së Lirë Siriane, një koalicion i gjerë i forcave rebele që kundërshtonte Assad-in. Po ashtu, mori komandën e batalionit Shabaab Al-Sunna (Rinia e Sunitëve) dhe më pas mori kontrollin në vendlindjen e tij, Bosra në Dara.

Sipas njerëzve të afërt me të, pavarësisht bashkëpunimit me ta, ai asnjëherë nuk u afrua me grupet rebele islamiste sikurse Jabhat al-Nusra apo Fronti Nusra, që u themelua nga Sharaa, i cili në atë kohë njihej me nofkën guerile, Abu Muhammad al-Jolani. Awda asnjëherë publikisht nuk ka shprehur dëshirën për një sundim sipas Ligjit të Sheriatit.