Aksion i Policisë – bastiset Banka e Postës në Veri

Policia e Kosovës së bashku me Agjencinë Tatimore, me autorizim të prokurorisë ka zhvilluar një aksion në Bankën e Postës në Mitrovicë të Veriut, për shkak të dyshimit se disa biznese po zhvillojnë veprimtari të kundërligjshme.

Lajmin e ka konfirmuar për Albanian Post, zëvendësdrejtori i Policisë në rajonin e Mitrovicës së Veriut, Veton Elshani, por ky i fundit nuk ka dhënë më shumë detaje.

Ndryshe, muajin e kaluar Policia ka konfiskuar një banesë dhe një restorant që janë në pronësi të Milan Radojiçiç-it i cili është edhe përgjegjësi i sulmit në Banjë të Zveçanit, më 24 shtator ku mbeti i vdekur rreshteri tashmë i shpallur hero nga institucionet e Kosovës, Afrim Bunjaku.

Më 3 prill, ministrja e Drejtësisë, Albulena Haxhiu, ka njoftuar se dikasteri të cilën ajo e drejton, përmes zyrtarëve të Agjencisë për Administrimin e Pasurisë së Sekuestruar dhe të Konfiskuar, kanë nisur zbatimin e Urdhrit Ndalues përfundimtar me masë të përkohshme, lidhur me pasuritë e paluajtshme të terroristëve të cilët janë të përfshirë në rastin e sulmit terrorist në Banjë.

Agjencia, sipas saj, ka filluar identifikimin e pasurive të përmendura në Urdhrin Ndalues, duke përfshirë edhe vilën e kryekriminelit, Milan Radojiçiç te Liqeni i Ujmanit në Zubin Potok dhe pasuritë e tjera.

“Ky identifikim i pasurisë po bëhet në përputhje me Ligjin për Administrimin e Pasurisë së Sekuestruar dhe të Konfiskuar, si dhe me Urdhrin e Gjykatës”, kishte njoftuar Haxhiu.