Amerika ngre në qiell avionin që ndryshon “rregullat” e luftës, nuk ka nevojë për pilotin

Një avion luftarak F-16 i modifikuar ka kryer me sukses testimet, duke fluturuar e duke luftuar në ajër me një tjetër avion pa pasur nevojën e kontrollit nga një piloti, gjithçka është bërë nga inteligjenca artificiale.

Gjatë fluturimeve testuese, avioni, i njohur si “X-62A” ose “VISTA”, kreu ngritjen nga pista, uljen dhe manovra të shumta luftarake pa pasur ndërhyrje nga njeriu për një total prej 17 orësh. Fluturimet nisën nga baza e Forcave Ajrore Edwards në Kaliforni, ndërsa zyrtarët dolën në përfundimin që avioni mund t’i dorëzohet plotësisht inteligjencës artificiale.

Algoritmet që i dhanë jetë këtij projekti u zhvilluan nga Agjencia e Projekteve të Avancuara të Kërkimit të Mbrojtjes (DARPA). Kjo është hera e parë që inteligjenca artificiale është përdorur në një avion. Më herët, ajo ishte përdorur vetëm në simulimet kompjuterike të betejave në ajër të avionëve F-16.

“Kemi kryer fluturime të shumta me pika të shumta testimi për të testuar algoritmin në situata të ndryshme, me kundërshtarë të ndryshëm të simuluar. Nuk hasëm ndonjë problem”, tha nënkoloneli i Forcave Ajrore Ryan Hefron.

Gjatë këtyre testeve të shumta, një pilot qëndroi në avion për arsye sigurie, por asnjëherë nuk qe e nevojshme që ai të reagonte.

Avioni X-62A do të jetë pjesë e të tjera inspektimeve, por pritet të rinisë fluturimet gjatë këtij viti.