Shtetet e Bashkuara kanë kryer një sulm ajror, që ka pasur në shënjestër Qassim Al-Rimin, udhëheqësin e Al-Qaeda’s në Gadishullin Arab (AQAP), degën e grupit terrorist në Jemen, që vazhdimisht ka shprehur interesim për të kryer sulme kundër Amerikës.
Lajmin e ka bërë të ditur një zyrtar amerikan, në kushte anonimiteti, teksa ka folur për CNN.
I pyetur për të konfirmuar lajmin, Pentagoni nuk ka pranuar të japë asnjë detaj rreth rastit.
“Përderisa jemi të njoftuar për raportime për vdekjen e udhëheqësit të AQAP, Qassim Al-Rimi, Departamenti i Mbrojtjes nuk ka asgjë për të thënë rreth kësaj çështjeje”, ka deklaruar një zyrtar i Mbrojtjes për CNN.
Qeveria amerikane, nëpërmjet programit të saj Shpërblime për Drejtësi, ka ofruar 10 milionë dollarë shpërblim për informata rreth udhëheqësit të Al-Qaedas.
Zyrtarët po vazhdojnë të hetojnë nëse Al-Rimi është vrarë nga sulmi ajror, nëpërmjet një varg metodash, përfshirë monitorimin e rrjeteve sociale dhe aplikacioneve të komunikimit, rreth bisedave për vdekjen e mundshme të tij.
Agjencia Qendrore amerikane e Inteligjencës, e njohur si CIA, nuk ka pranuar të flasë rreth raportimeve për sulmin ndaj terroristit.
Shumë ekspertë e kanë konsideruar AQAP’in në mesin e degëve më të rrezikshme të Al-Qaedas, nëse jo më të rrezikshmen, që nga formimi i saj më 2009.
Al-Rimi ishte bërë udhëheqës i grupit terrorist, pasi një sulm me dron më 2005 e kishte vrarë shefin e atëhershëm, Nasir al-Wuhayshi.
