Zëdhënësja e Ministrisë së Jashtme ruse, Maria Zakharova ka hedhur aludime se dërgesat e armëve perëndimore në Ukrainë kanë përfunduar në një treg të zi.
Kjo, veçanërisht në Evropën Perëndimore – përfshirë Shqipërinë dhe Kosovën.
Lajmin e bëri të ditur agjencia shtetërore “TASS”, duke cituar zyrtaren ruse.
“Ata e kuptojnë se çfarë do të ndodhë me gjithë këtë. Sipas raportimeve të mediave, bandat ndërkombëtare të krimit kanë zhvilluar një plan për eksportimet e armëve nga Ukraina, duke përfshirë armët e rënda. Dhe disa armë tashmë janë në Bosnjë, Shqipëri, Kosovë, etj.”, theksoi Zakharova.
Zëdhënësja e ministrisë sqaroi më tej se deri më tani autoriteti i vendit furnizues ka heshtur për këtë çështje.
Por ekspertët e pavarur dhe strukturat e lidhura me të, si Interpol-i, po ngrenë alarmin.
“Është e vërtetë tani, që Perëndimi, SHBA-të dhe NATO, në përgjithësi, po tregojnë shqetësim të pashembullt për fatin e Ballkanit. Por ne e kuptojmë se çfarë e ardhme e pret Ballkanin në krahun e NATO-s dhe me një treg kaq të rinovuar të paligjshëm të armëve”, shtoi diplomatja.
Interpol
Shumë nga armët që po dërgohen në Ukrainë do të kalojnë përfundimisht në duart e kriminelëve në Evropë dhe më gjerë.
Ky ishte paralajmërimi i Sekretarit të Përgjithshëm të Interpol-it, Juergen Stock, një javë më parë.
Shefi i organizatës ndërkombëtare u ka kërkuar vendeve që të fillojnë të shqyrtojnë databazat e gjurmimit të armëve.
“Ne tashmë po inkurajojmë vendet anëtare, kemi një databazë për shkëmbimin e informacionit mbi armët, që të përdorin këto baza të dhënash sepse asnjë rajon apo vend nuk mund të merret me të i izoluar”, u shpreh ai.
Stock deklaroi fillimisht se disponueshmëria e lartë e armëve gjatë konfliktit aktual do të rezultojë në përhapjen e armëve të paligjshme në fazën pas konfliktit.
Kjo, sipas tij, vetëm do të fuqizojë grupet e krimit të organizuar, operacionet e të cilave janë bërë gjithnjë e më globale.
