Këngëtarja e njohur shqiptare, Elsa Lila është arrestuar gjatë një operacioni kundër drogës në Itali.
Gazeta “La Repubblica” raporton se Lila ishte mes 13 personave në hetim, shqiptarë dhe italianë që janë vënë në pranga mëngjesin e së mërkurës në Romë.
Sipas asaj që raporton gazeta italiane, roli i këngëtares së njohur ishte mbajta e llogarive për grupin mafioz.
Përveç këngëtares 40-vjeçare, i përfshirë është dhe ish-kampioni i boksit në Shqipëri, Petrit Bardhi, i njohur si “Titi”.
Grupi italo-shqiptar sipas hetuesve të antimafias në Itali, merrej me shitjen e drogës në lokale të ndryshme të kryeqytetit.
Në këtë grup me bazë në Acilia sipas mediave italiane kishte lidhje dhe Arben Zogu, një mafioz i njohur në Itali.
Për të kamufluar aktivitetin e shpërndarjes së drogës, grupi pajiste lokalet me makineri të lojërave të fatit.
Grupi merrej me shitjen e kokainës, hashashit dhe marijuanës.
Elsa Lila ka fituar shumë çmimeve muzikore në Shqipëri, përfshirë dy herë radhazi Festivalin e Këngës.
Në1996, kur ishte 15 vjeçe, Lila fitoi festivalin e RTSH-së përmes një televotimi. Një vit më pas, ajo fitoi sërish.
Në 1998, Elsa Lila u njoh dhe në arenën ndërkombëtare pasi fitoi festivalin ndërkombëtar në Bullgari ‘Varna’.
Në 2001, Lila mori dekoratën ‘Ambasadore e Muzikës Shqiptare në Botë’, nga ish-presidenti Rexhep Meidani.
Në 2007, Lila mori pjesë në festivalin e 57-të të Sanremos në Itali me këngën “Il senso della vita”.
