Atentat një oficeri të lartë të inteligjencës iraniane, dyshohet se është dora e Mosad-it

Një oficer i lartë i inteligjencës i Korpusit të Gardës Revolucionare Islamike të Iranit, Mohammed Akiki ka rënë pre e një atentati. Mediat ndërkombëtare raportojnë se ai ka rënë pre e një sulmi në Teheran dhe aktualisht ndodhet në spital në gjendje kritike pas plagëve të rënda të raportuara.

Fillimisht ishte shkrimtari izraelit Amir Tsarfati që shkroi për atentatin ndaj zyrtarit të lartë të shërbimeve sekrete iraniane në kanalin e tij në Telegram duke nënvizuar se Akiki ndodhet në terapi intensiven një spital në Teheran. Më pas lajmi u konfirmua edhe nga rrjeti Bnn.

Për momentin ka mungesë informacioni për sulmin, por sipas ekspertëve dhe analistëve të ngjarjeve në Iran duket se atentati lidhet me situatën shpërthyese në Lindjen e Mesme, pas agresionit të Hamasit ndaj Izraelit dhe reagimin e shtetit hebre. Edhe shkrimtari izraelit Amir Tsarfati nuk përjashtoi mundësinë e përfshirjes së shërbimit sekret, Mosad në këtë atentat.

Kjo mund të jetë një hakmarrje për rolin e Iranit në sulmin e Hamasit. Profesori italian Daniele Ranieri shkruante pak ditë më parë se sulmi i Hamasit ka prishur të gjithë “status quo”-në në Lindjen e Mesme. Sipas tij, hakmarrja e Izaelit do të ketë pasoja edhe në Iran, por edhe në Liban për shkak të përfshirjes së Hezbollahut në këtë vend, në regjimin e Asadit në Siri, Jemen dhe Irak.

Ka edhe një hipotezë tjetër që lidhet me sulmin ndaj kreut të “007”-ës iraniane. Edhe pse më pak e mundshme është hipoteza se sulmi ndaj Akiki-t është i lidhur me protestat dhe tensionet në Iran kundër regjimit, protesta që filluan më shumë se një vit më parë pas vdekjes së Mahsa Amini.