Avokati shqiptar flet për mundësinë që Kosova të shpallë “non grata” Ramën: Ja çka duhet të bëjë Kurti

Vizita e kryeministrit të Shqëpërisë Edi Rama në Beograd, ku u mbajt takimi i radhës i nismës “Ballkani i hapur”, ka nxitur reagime të shumta në Kosovë.

Rama u prit me darkë e verë të kuqe nga presidenti serb Aleksandar Vuçiq. Duke komentuar këtë takim, avokati shqiptar Spartak Ngjela, ka arsyetuar zërat në Kosovë, që kryeministri Rama duhet të shpallet “non grata” nga institucionet e Kosovës.

Megjithatë, ai ka thënë se për këtë vendim, duhet pritur edhe pak, për shkak se një vendim i tillë do të dëmtonte dy shteteve shqiptare.

“Kanë të drejtë. Por duhet pritur edhe ca, sepse dëmtohen shumë marrëdhëniet e dy shteteve shqiptare në Ballkan. Teoria moderne e luftës për këtë rast është kjo: ta çojmë luftën deri në zgrip, por mos ta shpallim. Non grata është masë ekstreme”, është shprehur Ngjela për gazetën “Bota sot”.

Si strategji, avokati ka përmendur komunikimin me tona të ashpra mes kryeministrit të Kosovës Albin Kurti dhe homologut të tij Edi Rama. Sipas tij, rruga më e favorshme për çështjen shqiptare është superioriteti moral dhe patriotik i Kurtit ndaj Ramës.

“Komunikimi i brendshëm me tone të ashpra diplomatike; duhet të zhvillohet midis Kurtit dhe Ramës; dhe Kurti duhet të jetë doktrina patriotike. Ne ende nuk po kuptojmë ku kullot Rama; por mos harroni se është shefi i mazhorancës në Kuvendin e Shqipërisë. Politika moderne nuk paralizon marrëdhëniet, por krijon superioritet ndaj kundërshtarit. Në funksion të kësaj; rruga më në favor për çështjen shqiptare është superioriteti moral dhe patriotik i Kurtit ndaj Ramës. Deri në diskreditim të Ramës në funksion të shqiptarizmit që sot po kthehet në doktrinë quasi botërore”, ka thënë Ngjela.