Bashkohen AAK dhe PDK kundër Kurtit, ky është vendimi që kanë marrë

Aleanca për Ardhmërinë e Kosovës (AAK) po kërkon rrugë për t’ia pamundësuar qeverisë Kurti heqjen e taksës.

Kjo parti është angazhuar që ta parandalojë heqjën e taksës 100 për qind ndaj mallrave serbe dhe atyre boshnjake, vendim ky i paralajmëruar nga kryeministri Albin Kurti dhe i përkrahur edhe nga një pjesë e LDK-së.

AAK-ja e ish kryeministrit Ramush Haradinaj është e prerë në qëndrimin e saj se nëse taksa hiqet ose vendimi për heqjen e saj është afër, atëherë është e pashmangshme mbajtja e seancës së jashtëzakonshme të Kuvendit të Kosovës.

Zyrtarë të AAK-së kanë thënë sot se kjo parti tashmë ka nisur mbledhjen e nënshkrimeve për këtë seancë.

“Kemi nisur mbledhjen e nënshkrimeve nga partitë tjera dhe jemi gati për t’i siguruar 40 nënshkrimet e nevojshme për seancën e jashtëzakonshme. Votat i kemi kërkuar te PDK dhe NISMA”, ka thënë një zyrtar i AAK-së.

E sa i përket taksës, opozita duket njëzëri kundër heqjës së saj.

Zëdhënësi i PDK-së, Avni Bytyçi th se kjo parti është në proces e sipër për dhënien e nënshkrimeve për seancën parlamentare ku do të diskutohet për tarifën 100%.

“Si parti, ne gjithmonë do t’i japim nënshkrimet për seanca, kur duhet diskutuar temat me rëndësi për qytetarët në Kuvendin e Kosovës. Kjo është dëshmi për rolin tonë konstruktiv në opozitë. Nënshkrimet e deputetëve tanë për këtë seancë, nuk nënkuptojnë detyrimisht epilogun e kësaj seance. Është interes i qytetarëve, zëri i të cilëve jemi ne si partia më e madhe opozitare, që të kërkojmë qartësim nga Qeveria përse po kërkon me ngut heqjen e taksës, cili është plani i tyre dhe si do të duket reciprociteti që kanë propozuar”, ka thënë Bytyçi.

Sipas tij, ky veprim i partive qeverisëse është i paqartë dhe rrethanat duhen sqaruar, duke pasur parasysh se në të kaluarën Lëvizja Vetëvendosje dhe Lidhja Demokratike e Kosovës ishin kundër suspendimit të taksës kur PDK-ja kishte propozuam para një viti.