“Bëre që emri i shqiptarëve të shkruhet në histori”, postimi emocionues i babait të Granit Xhakës pas nominimit për Topin e Artë

Babai i Granit Xhakës, Ragipi, ka reaguar me një postim emocionues pas përfshirjes në listën prej 30 lojtarëve për Topin e Artë 2024.

Mbrëmë (e mërkurë) u publikua lista me 30 të nominuarit për Topin e Artë 2024, çmim i cili do të dhurohet më 28 tetor në Paris.

Në këtë listë nuk munguan emra yjesh që shihen si favorit për ta fituar si: Vinicius Junior, Rodri, Jude Bellingham, Kylian Mbappe dhe Erling Haaland.

 

Në listën i përfshirë ishte edhe ylli shqiptar i Bayer Leverkusenit, Granit Xhaka, i cili bëhet shqiptari i parë që gjendet në listën e nominuarve.

Arritja e tij e madhe ka bërë që babai i mesfushorit të Zvicrës, Ragipi, të reagojë me një postim emocionues, duke treguar se ndihet krenar.

Postimi pa ndërhyrje i Ragip Xhakës

Sot është një ditë e veçantë dhe e mbushur me krenari të madhe për mua dhe familjen tonë. Djali im, Graniti, është nominuar për çmimin prestigjioz Ballon d’Or. Ai është i pari shqiptar dhe në të njëjtën kohë lojtari i vetëm zviceran që ka arritur këtë nivel në botën e futbollit, dhe për këtë jemi jashtëzakonisht të lumtur dhe të emocionuar.

Puna e palodhur, përkushtimi dhe sakrificat e tij kanë bërë që ëndrrat të realizohen dhe emri i shqiptarëve të shkruhet në histori. Ju falënderoj të gjithëve për mbështetjen dhe dashurinë që i keni dhënë Granitit ndër vite.

Urime Granit, krenaria jonë!