Koalicioni opozitar “Aleanca për Shqipërinë Madhështore”, i përbërë nga Partia Demokratike dhe aleatët, çeli zyrtarisht fushatën zgjedhore nga sheshi “Nënë Tereza” në Tiranë, për zgjedhjet parlamentare të 11 majit. Kreu i PD-së, Sali Berisha, u shfaq për herë të parë në publik pas një kohe, krah strategut amerikan Chris LaCivita.
“Sonte nisim betejën e fitores, betejën e Shqipërisë Madhështore, në të cilën Shqipëria ngrihet përsëri”, deklaroi Berisha në fjalimin hapës. “Këto 12 vite ishin vite të shkretimit, të varfërimit, të largimit të mbi 1 milionë shqiptarëve nga vendi”, shtoi ai.
Duke e cilësuar qeverinë aktuale si “regjim”, Berisha akuzoi se “regjimi i Tiranës dhe mafia ndërkombëtare kanë fshirë arritjet madhore të Shqipërisë pluraliste”. Ai përmendi edhe pensionistët, të sëmurët dhe familjet shqiptare si më të prekurat nga politikat e qeverisë: “700 mijë pensionistë qajnë pothuajse çdo ditë me lot të ftohtë mjerimi… mijëra të sëmurë nuk marrin ilaçet dhe mbështeten në mëshirën e sëmundjes.”
Strategu amerikan i fushatës së PD-së, Chris LaCivita, dha një mesazh nga podiumi:“Në 2024 në SHBA, socialistët u përpoqën të burgosin Donald Trump, dështuan. Në 2025 në Shqipëri, po përpiqen të burgosin opozitën, dhe do të dështojnë. Pse? Sepse nuk kanë çfarë të thonë për dështimet e 12 viteve.”
Ai shtoi: “Votoni për dr. Berishën, jepini vendit tuaj mundësinë dhe jepini njerëzve shpresë.”
Në fushatë u prezantuan kandidatët për 12 qarqet e vendit. Anëtari i FRPDSH-së, Orest Berberi, deklaroi: “Partia Demokratike është zemra e shqiptarëve të lirë… Ne jemi njishat. Do të rrëzojmë çdo hienë.”
Fermeri nga Lushnja, Komi Furrxhi, u shpreh: “Unë kërkoj që shteti të më trajtojë si investitor… Sali Berisha po e tha fjalën, e mban. Nafta pa taksa, subvencione për çdo fermer, ndihmë për të shitur prodhimet – këto nuk janë luks.”
Artjola Tabaku, një qytetare e re, solli shqetësimin për çmimet e apartamenteve:“Çmimi i një apartamenti modest u dyfishua në vetëm 5 vite! Apartamente ka më shumë se kurrë, por popullatë më pak se kurrë.”
Ndërsa mësuesja Alketa Lugaj denoncoi politizimin në sistemin arsimor:“Drejtuesit e shkollave janë kthyer në komisarë politikë… Programi i PD mishëron idealet e një arsimi modern dhe të drejtë. Paga mesatare e mësuesit do jetë 1300 euro, e pedagogut 2000 euro.”
Berisha e mbylli fjalën me referenca historike ndaj arritjeve të qeverive të PD-së:“Ne e futëm Shqipërinë në NATO, liberalizuam vizat, ndërtuam Rrugën e Kombit dhe realizuam TAP-in e Kaskadën e Devollit. Këtë herë, projekti është më i madh: Shqipëria Madhështore.”
Në hyrje të bulevardit që çon drejt podiumit ishin vendosur 11-të shifra “1”, që simbolizojnë numrin e koalicionit në fletën e votimit. Flamuj shqiptarë, amerikanë dhe të BE-së valëviteshin në duart e simpatizantëve që brohorisnin për Berishën.
