Berisha krah Izraelit, thotë se “diktatura e Ajatollahëve” po shkon drejt fundit të merituar

Kreu i Partisë Demokratike, Sali Berisha, ka dalë publikisht hapur në mbështetje të Izraelit dhe goditjeve të fundit në Iran, duke përmendur se “diktatura e Ajatollahëve” po shkon drejt fundit të merituar.

Përmes një publikimi në median sociale Facebook, Berisha ka bërë disa reflektime mbi situatën e fundit në Lindjen e Mesme, duke thënë se goditjet në zemër të regjimit nga forcat ajrore izraelite të mbështetura nga SHBA, po çojnë drejt fundit të merituar regjimin diktatorial, obskurantist, luftënxitës e destabilizues të Teheranit.

Berisha, përmend po ashtu se PD-ja e beson fundin e regjimit iranian dhe çlirimin e popullatës me rikthimin e paqes në Lindjen e Mesme.

Mesazhi i plotë:
Diktatura teokratike e Ajetullahëve të Teheranit drejt fundit të merituar!

Të dashur miq, goditjet në zemër të regjimit nga forcat ajrore izraelite të mbështetura nga SHBA, asgjësimi i elitës terroriste të Gardës dhe të ushtrisë së Ajetullahëve, sistemeve mbrojtëse dhe impianteve bërthamore dhe objekteve të tjera strategjike, po çojnë drejt fundit të merituar regjimin diktatorial, obskurantist, luftënxitës e destabilizues të Teheranit.

Partia Demokratike beson se fundi sa më i shpejtë i regjimit obskurantist të Ajetullahëve, armik i egër i kombit iranian dhe lirive të tij, shënon çlirimin e këtij kombi të madh dhe një fitore të vërtetë për paqen dhe bashkëpunimin në Lindjen e Mesme.