Ish-kryeministri Sali Berisha ka mbërritur në ambientet e Prokurorisë së Posaçme, pas masës së sigurisë ‘detyrim paraqitje’ të vendosur nga Apeli i GJKKO.
Ndërkohë në të njëjtën kohë në SPAK ka shkuar edhe deputetja e Partisë së Lirisë, Monika Kryemadhi, e cila ka të njëjtën masë me Berishën, pra ‘detyrim paraqitje’.
Ndërkohë me dhjetëra efektivë Policie janë mbledhur para Prokurorisë së Posaçme, për të siguruar mbarëvajtjen e protestës së organizuar nga PD.
Masa ‘detyrim paraqitje’ e vendosur ndaj Berishës nuk është pritur mirë nga drejtuesit e Partisë Demokratike të cilët e kanë quajtur masën të motivuar politikisht.
PD u ka dërguar më herët strukturave një njoftim përmes mesazheve në celular, ku i kërkohet pjesëmarrja në protestë, shkruan A2 CNN.
“Të dashur miq. Ditën e Hënë, në orën 9:30, të mobilizojmë të gjithë strukturat e degëve për të protestuar përpara SKAP- it, si vegël në duart e Ramës për të përndjekur kundërshtarët politik. Do jemi aty në mbështetje të të drejtës, të ligjit dhe të vërtetës, që është në anën e kryetarit të PD, Prof. Dr. Sali Berisha. Në orën 9:30 përpara selisë së SKAP-it. Faleminderit!”, thuhet në njoftimin e PD drejtuar strukturave.
