Bloomberg: SHBA po përgatit paketë të re sanksionesh kundër Rusisë, nëse Putini refuzon marrëveshjen e paqes

Shtetet e Bashkuara të Amerikës po përgatisin një paketë të re sanksionesh ndaj sektorit energjetik të Rusisë, me qëllim rritjen e presionit ndaj Moskës në rast se presidenti rus Vladimir Putin refuzon një marrëveshje paqeje me Ukrainën, raporton Bloomberg, duke u thirrur në burime të njohura me planet.

Sipas këtyre burimeve, Uashingtoni po shqyrton disa opsione, përfshirë sanksionimin e anijeve të ashtuquajtura të “flotës së hijes” ruse – cisterna ilegale që përdoren për transportin e naftës ruse – si dhe tregtarëve që marrin pjesë në këto transaksione. Burimet kanë folur në kushte anonimiteti për shkak të natyrës konfidenciale të diskutimeve.

Disa zyrtarë kanë bërë të ditur se masat e reja mund të shpallen që gjatë kësaj jave. Bloomberg raporton se sekretari amerikan i Thesarit, Scott Bessent, ka diskutuar për këto plane ditët e fundit me një grup ambasadorësh evropianë, në kuadër të koordinimit me aleatët.
Sanksionet e reja pritet të synojnë kufizimin e mëtejshëm të të ardhurave të Rusisë nga eksporti i energjisë, të cilat konsiderohen jetike për financimin e luftës kundër Ukrainës.

Ndërkohë, SHBA-ja dhe vendet evropiane kanë hartuar një plan paqeje që parasheh forcimin e ushtrisë ukrainase, vendosjen e forcave evropiane brenda Ukrainës dhe rritjen e përdorimit të inteligjencës amerikane. Qëllimi i këtij plani është të shërbejë si bazë për një armëpushim më të gjerë dhe të pengojë sulme të ardhshme ruse.

Megjithatë, arritja e një armëpushimi gjithëpërfshirës mbetet e vështirë, pasi Rusia nuk është e përfshirë drejtpërdrejt në këto negociata. Zyrtarët rusë kanë përsëritur se Moska nuk do të pranojë praninë e forcave të NATO-s në Ukrainë dhe vazhdon të kërkojë lëshime territoriale.

Pavarësisht kësaj, zyrtarë amerikanë kanë shprehur optimizëm se presioni i shtuar ekonomik, përfshirë sanksionet e reja, mund ta detyrojë Kremlinin të rishqyrtojë qëndrimin e tij.