Çoi makinën në lavazh, gruas në Prizren i vjedhin mbi 7 mijë euro

Një gruaje në Kosovë i kanë vjedhur mbi 7 mijë euro pasi e kishte dërguar makinën për ta pastruar në lavazh. Ngjarja ka ndodhur me datë 8 Dhjetor në rrugën “Rifat Krasniqi” në Prizren, por u raportua vetëm së fundmi.

“Rasti ka ndodhur më 8 dhjetor, është raportuar tek dje pra më datë 13 dhjetor. Viktima ka raportuar se i kishte nxjerrë paratë për t’i deponuar në bankë, por kur ishte kthyer nuk i kishte gjetur paratë”, ka thënë polici Shaqir Bytyqi për Klan Kosova.

Ai theksoi se po punohet në identifikimin dhe arrestimin e të dyshuarit. “Jemi duke punuar në arrestimin e të dyshuarit. Nga kamerat e sigurisë vërehet se si i dyshuari afrohet tek vetura duke tentuar që të marrë diçka. Po punojmë në identifikimin e tij”, shtoi ai.