Danimarka konfirmon për herë të parë se dronët në hapësirën ajrore të saj ishin rusë: Rusia po na teston

Rusia po zhvillon një luftë hibride kundër Danimarkës dhe Evropës, duke përdorur mjete ushtarake dhe presion agresiv pa kaluar kufijtë e një konflikti të armatosur tradicional, ka thënë drejtori i Shërbimit të Inteligjencës Ushtarake Daneze (FE), Thomas Ahrenkiel, gjatë një konference për shtyp me ministrin danez të Mbrojtjes, Troels Lund Poulsen.

Ahrenkiel dha shembuj konkretë të kërcënimeve: “Anija zbarkuese ruse që ishte ankoruar së fundmi në ujërat ndërkombëtare në jug të ishullit danez Langeland ishte ndoshta e gatshme të ndërhynte nëse do të përpiqeshim të pengonim një anije ruse nga ‘flota në hije’ të lundronte lirisht.”

Ai shtoi se anijet luftarake ruse shpesh kanë lundruar në kurs përplasjeje me anijet daneze dhe kanë drejtuar armë dhe radarë kundër helikopterëve dhe anijeve të marinës daneze.

Inteligjenca daneze ka regjistruar gjithashtu ndërprerje të gjera të sinjalit GPS dhe përdorim të sonarëve dhe pajisjeve bllokuese nga anijet ruse në ngushticat daneze. Javën e kaluar, dronë të paidentifikuar u shfaqën mbi gjashtë aeroporte dhe baza ushtarake daneze, dyshohet të jenë ngritur nga anijet ruse drejt porteve të Kaliningradit dhe Shën Petersburgut.

Ahrenkiel tha se “Rusia ka futur qëllimisht dronë në hapësirën ajrore evropiane për të na testuar. Ajo dëshiron t’i demonstrojë fuqi ushtarake Perëndimit. Rusët duan që ne të besojmë se ekziston një kërcënim i afërt lufte. Ata madje thonë publikisht se janë në luftë me Perëndimin. Kjo është pjesë e luftës së informacionit të Rusisë kundër nesh.”

Megjithatë, Rusia nuk kërkon një konflikt të drejtpërdrejtë me Danimarkën.

“Një konflikt i armatosur është shumë i rrezikshëm për Rusinë. Ne besojmë se Rusia nuk do të kryejë një sulm ushtarak konvencional, por po armatoset në mënyrë që përfundimisht të zhvillojë një luftë kundër NATO-s më vonë,” shtoi Ahrenkiel.

Ai përmendi edhe sulmet kibernetike pro-ruse ndaj infrastrukturës ujore të Danimarkës dhe saktësoi se shërbimet daneze përballen me rreth 6,000 sulme hakerash në orë: “Ka të ngjarë që Rusia të ketë arritur në përfundimin se mund t’i përdorë këto instrumente pa rrezikun e përshkallëzimit ose hakmarrjes. Ka gjithashtu të ngjarë që ajo të besojë se vendet e NATO-s qëndrojnë pas aktiviteteve të ngjashme të drejtuara kundër Rusisë.”