Në emisionin “#Hashtag” me Krenare Vokshi-Shala është diskutuar për të drejtat e grave në Kosovë dhe më gjerë.
Deputetja e Vetëvendosjes, Labinota Demi-Murtezi thotë se shoqëria në Kosovë është paragjykuese ndaj mënyrave të veshjes së grave dhe vajzave.
“Gjithçka është në rregull derisa veshja është zgjedhje e vet grave…Do të isha mbështetësja më e fuqishme e atyre grave dhe vajzave që u imponohet veshja e tyre qoftë mbulesë apo zhveshje e tepërt, ose diçka tjetër nëse ajo bie ndesh me dëshirën e tyre”, tha ajo, përcjell Telegrafi.
Demi-Murtezi thotë se në Kosovë vajzat me mbulesë po diskriminohen duke mos u lejuar të bëhen pjesëtare të FSK-së, derisa në Skoci ato inkurajohen për tu bërë police në mënyrë që të përfaqësohen të gjitha komunitetet.
Ajo thotë se gratë me mbulesë janë të pranishme kryesisht në institucione ku kanë arritur me votë ndërsa në mjaft institucione sipas saj ka hezitime dhe diskriminime ndaj tyre.
“Është një rast kur një mësuese vetëm pse ka pasur mbulesë është mbajtur larg shkollës për nëntë vite, por më pas gjykata ka vendosur në favor të saj duke u kthyer në vendin e punës dhe madje duke marrë edhe pagat për ato vite që është mbajtur larg shkollës”.
Megjithatë deputetja e mazhorancës thotë se jo vetëm gratë me mbulesë por të gjitha gratë në Kosovë janë në gjendje të vështirë.
“Vetëm një në tetë gra në Kosovë punon, pavarësisht se ato diplomojnë më shumë në universitete”, tha ndër të tjera Labinota Demi Murtezi.
