Dështon plani i grabitjes së bankës tek Bulevardi Zogu i Parë, policia zbulon tunelin nëntokë

Një grabitje banke përmes një tuneli në bulevardin kryesor të Tiranës pranë ish-stacionit të Trenit, është parandaluar pas zbulimit të armës së zjarrit në trotuarin para ministrisë së Drejtësisë.

Sipas hetimeve, autorët kishin planifikuar të hynin nëpërmjet kanaleve të nëndheshme të ujërave te zeza në filialin e bankës por ngjarja ka dështuar në momentin e fundit.

Shërbimet e Policisë, në bazë të informacioneve të siguruara në rrugë operative, se në bulevardin “Zogu I” po kryheshin gërmime, duke përdorur tunele të nëndheshme, me qëllim depërtimin në ambientet e brendshme të një banke të nivelit të dytë, falë reagimit të menjëhershëm, kanë bërë të mundur parandalimin e vjedhjes në bankë.

Në një deklaratë të policisë theksohet se Shërbimet e Policisë janë duke kryer hetime të thelluara me qëllim identifikimin, kapjen e autorëve dhe vënien e tyre para përgjegjësisë.

Pas konstatimit të ngjarjes, materialet hetimore i kaluan Prokurorisë së Rrethit Gjyqësor Tiranë, për veprime të mëtejshme procedurale, për veprën penale “Vjedhja e bankave dhe arkave të kursimit” kryer në bashkëpunim.