Ditari i një ushtari të vrarë koreano-verior zbulon taktikat e tyre të luftimeve në Ukrainë, kishte dokumente identifikimi false

Të dhënat e fundit të një ushtari të vrarë në luftimet në Kursk janë publikuar ndërsa Pheniani regjistron humbje në rritje midis trupave të tij. Ditari i një ushtari të Koresë së Veriut zbulon se si trupat nga Pheniani po përdoren si “karrem” për të tërhequr dronët ukrainas, të cilët më pas i rrëzojnë.

Ditari i një ushtari të rënë, botuar nga Forcat e Operacioneve Speciale të Ukrainës, përshkruan këto taktika, së bashku me shprehjet e besnikërisë ndaj Kim Jong-un dhe dëshirën për t’u kthyer në atdheun e tij, raporton The Ëall Street Journal.

Në njërën faqe të ditarit, ka një vizatim që tregon një ushtar që del nga kopertina për të tërhequr vëmendjen e një droni, ndërsa dy shokët e tij presin gati për ta rrëzuar.

“Edhe me çmimin e jetës sime, unë do të zbatoj urdhrat e Komandantit Suprem pa hezitim”, thuhet në një hyrje nga ditari.

“Unë do t’i tregoj botës guximin dhe sakrificën e forcave speciale të Kim Jong-un.”

Pak dihej për aktivitetet e trupave të Koresë së Veriut në Kursk deri vonë, kur Ukraina filloi të ndajë detajet e humbjeve të tyre. Me ushtarët e rënë u gjetën letra dhe shënime dhe javët e fundit një njësi e operacioneve speciale ukrainase ka lëshuar pesë shënime të shkruara me dorë që pretendon se i përkasin të njëjtit ushtar, duke përfshirë vizatimin e lartpërmendur.

Kush është autori i ditarit?

Sipas një pasaporte të gjetur nga zyrtarët ukrainas, autori i ditarit quhet Jong Kyong Hong. Ai dhe dy nga shokët e tij u vranë në një përleshje të 21 dhjetorit me forcat speciale ukrainase pranë fshatit Pogrebki në skajin jugperëndimor të Kurskut. Gjithashtu u zbulua se kishin dokumente identifikimi false.

Analizat e ADN-së të kryera nga autoritetet ukrainase treguan se tre ushtarët ishin me origjinë nga Azia Lindore – kineze, koreane ose japoneze, tha zëdhënësi ushtarak ukrainas Oleksandr Kindratenko.

Shkrimi i dorës në ditar, i shkruar në koreanisht, u identifikua si “pagabueshëm koreano-verior”. Dhe frazat në ditar duken autentike. Për shembull, në përshkrimin e një sulmi me dron, fjala “so-myol” përdoret për “shkatërrim”. Në Korenë e Jugut, termi përdoret për të përshkruar zhdukjen e llojeve të kafshëve.

Më 9 dhjetor, Jong regjistroi festimin e ditëlindjes së një miku që ai e quan “shoku im më i ngushtë”. Ai ka shkruar se ka mall për atdheun e tij, pasi “u largua nga përqafimi i ngrohtë i një babai dhe nëne të dashur”.