Clint Hill, agjenti i Shërbimit Sekret Amerikan i cili u hodh mbi limuzinën e John F. Kennedy-t gjatë atentatit në Dallas, u nda nga jeta në moshën 93-vjeçare, shkruan A2 CNN. Hill, i cili më vonë u bë një autor bestseller, u përball për dekada me ndjenjën e fajit për vrasjen e presidentit Kennedy. Ai ndërroi jetë të premten në shtëpinë e tij në Kaliforni, sipas një deklarate të lëshuar nga publicisti i tij.
Më 22 nëntor 1963, Hill ishte caktuar për të mbrojtur bashkëshorten e presidentit, Jacqueline Kennedy. Ai po udhëtonte në një makinë pas limuzinës presidenciale kur u dëgjua e shtëna e parë.
Pa humbur kohë, ai vrapoi drejt makinës së presidentit dhe u përpoq të hipte mbi pjesën e pasme të saj, ndërkohë që të shtënat vazhdonin. Ky moment dramatik u kap nga xhirimi i famshëm amator i Abraham Zapruder, i cili mbetet një nga dëshmitë më të qarta të atentatit.
Hill, i lindur në Dakotën e Veriut, shërbeu në ushtri përpara se të bashkohej me Shërbimin Sekret në vitin 1958. Për veprimet e tij heroike në Dallas, ai u nderua me një çmim dhe arriti deri në postin e nëndrejtorit të Shërbimit Sekret.
Megjithatë, trauma që përjetoi gjatë atentatit e shtyu të largohej herët nga agjencia, duke u dalë në pension në vitin 1975, në moshën 43-vjeçare. Hill ishte i bindur se mund të kishte shpëtuar jetën e presidentit dhe shpesh shprehte ndjenjën e fajit për atë që ndodhi.
“Nëse do të kisha reaguar një sekondë më shpejt, ndoshta nuk do të isha këtu sot”, tha ai në një intervistë për CBS 60 Minutes. Kur u pyet nëse do të kishte marrë plumbin në vend të presidentit, ai u përgjigj: “Po, do të kisha pranuar pa asnjë hezitim”.
Ndikimi i ngjarjes e ndoqi gjatë gjithë jetës, por ai mbetet një nga figurat më të njohura të atij momenti tragjik në historinë amerikane.
